ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމުގެ މަސްޢޫލިއްޔަތުތަކާއި ހަވާލުވެވަޑައިގަތުމަށް ފަހު އެންމެ ފުރަތަމަ ކުރެއްވި ދެ ދަތުރުފުޅުގައި ވަނީ ރާއްޖޭގެ ތަރައްގީއާއި ގުޅޭ ކަންކަމުގައި ގައުމުތަކާއެކު މުހިންމު މަޝްވަރާތަކެއް ކުރައްވާފައިކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ. 

ރައީސް ޑރ މުޢިއްޒުގެ ތުރުކީ ދަތުރާއި ދުބާއީ ދަތުރުގައި، ރާއްޖޭގެ ތަރައްގީއަށްޓަކައި ކުރެއްވި މަޝްވަރާތައް ފާހަގަކޮށް، އެކަމަށްޓަކައި އެ ކޯލިޝަނުން ވަނީ ރައީސަށް މަރުހަބާ ދަންނަވާ ބަޔާނެއް ނެރެފަ އެވެ. 

އެ ބަޔާނުގައި ބުނެފައި ވަނީ ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ މުހައްމަދު މުއިއްޒު ވެރިކަމާއި ހަވާލުވެވަޑައިގަތުމަށް ފަހު ކުރެއްވި ރަސްމީ ފުރަތަމަ ދަތުރުފުޅު ކާމިޔާބުކަމާއެކީ ނިންމަވާލެއްވި ކަމަށްޓަކައި މާތްﷲ އަށް ޙަމްދުކޮށް އެމަނިކުފާނަށް ވަރަށް އިޚްލާސްތެރިކަމާއެކު އެ ކޯލިޝަންގެ ލީޑަޝިޕާއި ސެނެޓު އަދި ކޯލިޝަންގެ އެންމެހާ މެމްބަރުންގެ ފަރާތުން މަރުހަބާ ދަންނަވާ ކަމަށެވެ. 

Advertisement

ރައީސް ޑރ މުއިއްޒު ވެރިކަމާއި ހަވާލުވެވަޑައިގަތުމަށް ފަހު އެންމެ ފުރަތަމަ ތުރުކީ ވިލާތަށް، އެ ފަހުން ކޮޕް 28 ކޮންފަރެންސްގައި ބައިވެރިވެވަޑައިގަތުމަށް ޔުނައިޓެޑް އަރަބް އެމިރޭޓްސް ދުބާއީއަށް ވަޑައިގެންފައިވާ އިރު، މި ދެ ދަތުރުފުޅުގައި ވެސް އެ މަނިކުފާނު ވަނީ ތުރުކީ އަދި ތަފާތު އެކި ގައުމުތަކުގެ އެންމެ އިސް ވެރިންނާއި ބައްދަލުކުރައްވާ އެ ގައުމުތަކާއި ރާއްޖެއާއި ދެމެދު އޮތް ގުޅުންތައް އިތުރަށް ވަރުގަދަކުރުމުގެ މަޝްވަރާތައް ކާމިޔާބުކަމާއެކު ކުރައްވާފައި ކަމަށެވެ. 

އެގޮތުން ތުރުކީ ވިލާތާއި ކޮޕް 28 ކޮންފަރެންސްގެ ހަވާސާގައި ތަފާތު އެކި ގައުމުތަކުގެ ވެރިންނާއި ބައްދަލުކުރައްވާ ކުރެއްވި މަޝްވަރާތަކުގެ ތެރޭގައި ދިވެހިރައްޔިތުން އެދޭ ރާއްޖެއަށް ބޭނުންވާ ތަރައްގީގެ މަޝްރޫއުތައް ހިންގުމުގައި އެ ގައުމުތަކުގެ އެހީތެރިކަން ހޯދުމުގެ މަޝްވަރާތައް ވެސް ވަރަށް ކާމިޔާބުކަމާއެކު ކުރިއަށް ގެންގޮސްފައިވާކަން ޕީޕީއެމް-ޕީއެންސީ ކޯލިޝަނުން ނެރުނު ބަޔާނުގައި ފާހަގަކޮށްފައި ވެއެވެ.

ޕްރޮގްރެސިވް ކޮންގްރެސް ކޯލިޝަނުން ވަނީ ރައީސް ޑރ މުޢިއްޒުގެ ވެރިކަމަކީ ކާމިޔާބު ވެރިކަމެއްކަމަށް ވުމަށް އުންމީދުކުރައްވާ ކަމަށް ބުނެފަ އެވެ. 

އޭގެ އިތުރުން ރައީސް މުއިއްޒުގެ ވެރިކަމަކީ ކާމިޔާބު ވެރިކަމަށް ހެދުމަށް އެ ކޯލިޝަންގެ ހުރިހާ މެމްބަރުން ވެސް އެމަނިކުފާނުގެ ފަހަތްޕުޅުގައި ތިއްބަވާނެ ކަމުގެ ފުރިހަމަ ޔަގީންކަން ދޭ ކަމަށް ވެސް ޕްރޮގްރެސިވް ކޮންގްރެސް ކޯލިޝަނުން ވަނީ ބުނެފަ އެވެ.