ނިމިދިޔަ ރިޔާސީ އިންތިޚާބުގެ ތެރޭގައި އޭރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ގދ ތިނަދޫ އަކީ ސިޓީއެއްކަމަށް ކަނޑައެޅުމާއި ގުޅިގެން، އެ ރަށު ކައުންސިލްގެ ހައިސިއްޔަތާއި މެދު އަރާފައިވާ އޮޅުންތައް ފިލުވުމަށް ރައްޔިތުންގެ މަޖިލީހުގެ ލާމަރުކަޒީ ކޮމެޓީއަށް ފޮނުވައިފި އެވެ. 

ތިނަދޫއަށް ސިޓީއެއްގެ ދަރަޖަ ދިން ނަމަވެސް، ޤާނޫނީ ގޮތުން ފުށުއަރާ ކަންތައްތަކެއް ހުރިކަން ފާހަގަކުރެވިފައިވާތީ، އެކަމުގެ ކަންބިޑުވުންތައް ގިނަބަޔަކު އޭރު ވެސް ދިޔައީ ފާޅުކުރަމުން ނެވެ. 

އެހެންކަމުން އެ ކަންބޮޑުވުންތަކާއެކު މިއަދު ކުރިއަށް ގެންދިޔަ ރައްޔިތުންގެ މަޖިލީހުގެ ލާމަރުކަޒީ ކޮމެޓީއަށް ތިނަދޫ ކައުންސިލްގެ ރައީސާއި ބައެއް މެމްބަރުން ވަނީ ހާޒިރުވެވަޑައިގެން، ތިނަދޫ ކައުންސިލްގެ ހައިސިއްޔަތާއި ގުޅޭގޮތުން އުފައްދާ ބައެއް ސުވާލުތައް ހިއްސާކުރައްވާފަ އެވެ. 

Advertisement

އެގޮތުން ކައުންސިލްގެ ރައީސް، ސައުދު އަލީ ވިދާޅުވީ، މައްސަލައަކީ ކުރީގެ ރައީސް، ތިނަދޫއަށް ސިޓީއެއްގެ ދަރަޖަ ދިނުމާއި ގުޅިގެން އުފެދިފައިވާ ހިޔާލުތަފާތުވުންތަކެއް ކަމަށާއި އެއީ ޤާނޫނަށް ގެނެވުނު 8 ވަނަ އިސްލާހާއި 9 ވަނަ އިސްލާހުގައި ދިމާވި މައްސަލަ ކަމަށެވެ.

ޤާނޫނު މާނަކުރުމުގައި އެކި މައްސަލަތައް ދިމާވުމާއި ގުޅިގެން އެ މައްސަލަ ޙައްލުކުރުމަށް ގޮންޖެހުންތަކެއް ހުރި ކަމަށާއި، އިދާރާތަކުން މިހާރި ފޮނުވާ ސިޓީތަކުގައި ސިޓީ ކައުންސިލަށް އަދި ތިނަދޫ ކައުންސިލަށް ވެސް އެޑްރެސްކުރައްވަމުންދާތީ ފުށުއެރުންތަކެއް ހުރިކަން ވެސް އޭނާ ފާހަގަކުރެއްވި އެވެ. 

ސައުދު ވިދާޅުވީ ކުޅުދުއްފުށި ސިޓީ ނުވަތަ ފުވައްމުލަކު ސިޓީ އުފައްދަވާފައިވަނީ ޤާނޫނުގެ 37 ވަނަ މާއްދާގެ ދަށުން ކަމަށްވެފައި، ތިނަދޫއަށް ސިޓީއެއްގެ ދަރަޖަ ދެއްވާފައިވަނީ ޤާނޫނުގެ 51 ވަނަ މާއްދާގެ ދަށުންކަމަށް ވުމުން، ކައުންސިލް ހިންގަން ޖެހެނީ އޭރެއްގައި އޮންނަ ރަށު ކައުންސިލެއްގެ ދަށުން ކަމަށް ބެނެފައިވާއިރު، ރަސްމީކޮށް އެ އިދާރާ ސިޓީ ކައުންސިލަކަށް ބަދަލުނުވާތީ، ސިޓީ ކައުންސިލަތަށް އެކަށޭނަ ސެކެޓްރީ ޖެނެރަލެއް އައްޔަން ކުރުމަށް ސިވިލް ސާވިސް ކޮމިޝަނަށް ވެސް ބޮޑެތި ގޮންޖެހުން ތަކެއް ކުރިމަތިވެފައިވާ ކަމަށެވެ. 

އެކަމާއި ގުޅޭގޮތުން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ވިދާޅުވީ އެ އިދާރާއިން މިހާތަނަށް މަސައްކަތް ކުރަމުން އައިސްފައިވަނީ ތިނަދޫ އަކީ ސިޓީއެއްކަމުގައި ބަލައިގެން ކަމަށެވެ. 

އެގޮތުން ޚިދުމަތްތައް ދިނުމުގައްޔާއި، ބަޖެޓުގައި ބްލޮކް ގްރާންޓު ހިމަނައިގެން އެކަން ފަހިކޮށްދީފައިވާނެ ކަމަށް ވެސް އާދަމް ޝަރީފް ވިދާޅުވި އެވެ. އަދި ވިދާޅުވީ ރަނގަޅު ކުރަން ޖެހޭ ކަންކަން ރަނގަޅު ކުރުމަށް އެޓާނީ ޖެނެރަލްގެ އޮފީހުގެ ލަފަޔަކަށް ވެސް އެދިލައްވާފައިވާނެ ކަމަށެވެ. 

އެކަމާއި ގުޅޭގޮތުން އެލްޖީއޭގެ ޑިރެކްޓާ ޖެނެރަލް ޝަމްއޫނު އާދަމް ވިދާޅުވީ، ޤާނޫނުގައިވާ ގޮތުން ސިޓީއެއްގެ ދަރަޖަ ލިބޭނީ އޭރަކު އޮންނަ ކައުންސިލެއް ނޫން އާ ކައުންސިލެއް އިންތިހާބު ކުރުމުން ކަމަށެވެ. 

އެހެން ނަމަވެސް ދައުރު ހަމަވުމުގެ ކުރިން ސިޓީއެއްގެ ދަރަގަ ދީފިކަމަށް ވާނަމަ، ސިޓީ ހިންގަމުންދާނީ އޭރަކު އޮންނަ ކައުންސިލެއްގެ ބާރުގެ ދަށުންކަމަށް އޭނާ ވަނީ ވިދާޅުވެފަ އެވެ.