އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ބޮޑު އަޣުލަބިއްޔަތެއް ޕީޕީއެމް ޕީއެންސީގެ ކޯލިޝަނުން ނަންގަވާނެ ކަމަށް ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވެއްޖެއެވެ.
އެބޭފުޅާ މިފަދައިން ވިދާޅުވީ ރޭ ޕީޕީއެމް ޕީއެންސީ ގެ ކޯލިޝަންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
"އެހެން ބަޔަކު ޕާޓީއެއް އުފައްދަފާނެތީ ނުވަތަ އެހެން ބަޔަކު ކުރިމަތި ލާނެތީ އެކަން ކަމަކާ ނުވިސްނަން. އަޅުގަނޑުމެން މިވިސްނަނީ އަޅުގަނޑުމެންގެ ކޯލިޝަނަށް މަޖިލީހުގެ ސާފު އަޣުލަބިއްޔަތު ހޯދަން. "
އަދުރޭ ވިދާޅުވިއެވެ.
އިތުރަށް އެބޭފުޅާ ވިދާޅުވީ ދެ ޕާޓީން އެކުގައި ނުކުމެ މިއަހަރުގެ ރިޔާސީ އިންތިޚާބު ކާމިޔާބު ކުރި ފަދައިން ކުރިއަށް ރައްޔިތުންގެ މަޖިލީހުގެ ބޮޑު އަޣުލަބިއްޔަތެއް ކޯލިޝަނުން ނަގާނެ ކަމުގެ ޔަގީންކަން އޮތް ކަމަށެވެ.
ކޯލިޝަނަށް މިހާރު މީހުން އިތުރުވަމުންދާކަން ފާހަގަ ކުރައްވައި، ރައްޔިތުންގެ މަޖިލީހުގެ ތަނަވަސް އަޣުލަބިއްޔަތެއް ނަގާނީ ރައީސް ޑރ.މުއިއްޒު ގެ ސަރުކާރު ގެ "ފޯމިއުލާ" ގެ ދަށުން ކަމަށް ވެސް އަދުރޭ ވިދާޅުވިއެވެ.
ރޭ ޕީއެންސީގެ އޮފީސް ހުޅުވުމަށް ބޭއްވި ޖަލްސާގައި ކޯލިޝަން ގެ ލީޑަރު އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ ޕީޕީއެމް ޕީއެންސީއިން 2024 ވަނަ އަހަރުގެ މަޖިލީހުގެ އިންތިހާބު ކާމިޔާބުކުރާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
