ޢާއިލާއަށް ވީނުވީ ތަނެއް ނޭނގި ގެއްލިގެން ފުލުހުން ހޯދަމުންދާ ކަމަށް ބުނެ އިއުލާން ކުރި މީހާ ފެނިފައިވާ ކަމަށް އެ އިދާރާއިން ބުނެފިއެވެ. 

ގެއްލިގެން ހޯދަމުންދާ ކަމަށް، ފުލުހުން މިއަދު އިޢްލާނު ކޮށްފައިވަނީ ނ. މިލަދޫ / ގުމުރީގެ، މުއްރަތު އަލީ އެވެ.

ފުލުހުން ބުނެފައިވަނީ މުއްރަތު ޢަލީ އާއިލާއަށް ޚަބަރެއްނުވެ ގެއްލިފައިވާ ކަމަށް ޑިސެމްބަރު 6 ވަނަ ދުވަހު ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ފުލުހުން ކުރަމުންދާ ކަމަށެވެ.

އަދި މުއްރަތު އަލީ މަސައްކަތްކުރަނީ ތިލަފުށީގައި ބޭނުންކުރާ ކޮޅުވެއްޓިއެއްގައި ކަމަށް އޭނާގެ އާއިލާއިން ފުލުހުންނަށް މައުލޫމާތުދީފައިވާ ކަމަށާ އޭނާ އެންމެ ފަހުން ފެނިފައިވަނީ ޑިސެމްބަރު 3 ވަނަ ދުވަހު 17:00 އެހައިކަންހާއިރު އެ ކޮޅުވެއްޓީގައި ހުއްޓައި ކަމަށްވެސް ފުލުހުން ބުނެފައިވެއެވެ.

ފުލުހުން މުއްރަތު ގެއްލިގެން އުޅޭކަން އާއްމުކޮށް އިއުލާން ކުރިތާ މާ ގިނަ އިރެއް ނުވެ، އެ އިދާރާއިން ކޮށްފައިވާ ޓުވީޓެއްގައި ވަނީ އެމީހާ ހުޅުމާލެ ފޭސް 2 ޕޮލިސް ސްޓޭޝަނަށް އަމިއްލައަށް ހާޒިރުވެފައިވާ ކަމަށާ ހާލު ރަނގަޅު ކަމަށް ބުނެފައެވެ.

އާއްމުކޮށް މީހުންނާއި ކުދިން ގެއްލިގެން އިއުލާން ކުރާތާ ގިނަ އިރު ތަކެއް ނުވެ އެމީހުން އަމިއްލަ އަށް އާއިލާއަށް ޚަބަރު ވާކަން ފާހަގަކުރެވެއެވެ.