ކުރީގެ ޓޫރިޒަމް މިނިސްޓަރު އަދި ކުރީގެ އެމްޑީޕީ ޗެއާޕާސަން ޢަލީ ވަހީދު އަނެއްކާވެސް އިދިކޮޅު މައި ޕާޓީ, އެމްޑީޕީއާ ގުޅިއްޖެއެވެ.
މިކަން އިއުލާން ކޮށް އަލީ ވަހީދު މިއަދު ކުރި ޓުވީޓެއްގައި ބުނީ، 7 އަހަރާއި 7 ދުވަސް ފަހުން އޭނާ މިއަދުނއަލުން އެމްޑީޕީ ގުޅިފައިވާ ކަމަށެވެ. އަދި އެމްޑީޕީ އަކީ އޭނާގެ "ގެ" ކަމަށާ އޭނާ އަކީ މިހާރު ފަޚުރުވެރި އެމްޑީޕީ މެމްބަރެއް ކަމަށެވެ.
"އިރާދަފުޅުން އެމް.ޑީ.ޕީ އަށާއި މުޅި ރާއްޖެއާއި ރާއްޖޭގެ ރައްޔިތުންނަށް ކާމިޔާބަށް އެދި ހިތްވަރާއި މުރާލިކަމާއެކު ޚިދުމަތް ކުރާނަން."
ޢަލީ ވަހީދު
އެމްޑީޕީ ޗެއާޕާސަންގެ މަގާމުވެސް އަދާކުރި އަލީ ވަހީދު އެޕާޓީން ވަކި ވުމަށް ގިނަ ދުވަސްތަކެއް ވަންދެން ޖުމްހޫރީ ޕާޓީގެ މެންބަރެއްގެ ގޮތުގައި ވެސް ހުއްޓެވެ.
އެގޮތުން ނިމިދިޔަ ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ ކެމްޕޭނު އޭޖެންޓެއްގެ ގޮތުގައި އޭނާ ހަރަކާތްތެރިވެފައިވާ އިރު، ކެންޕެއިންގެ ތެރެއިން އޭނާ ވަނީ އެމްޑީޕީ ސަރުކާރަށް ވަރަށް ބޮޑަށް ފާޑުކިޔާފައެވެ.
އަދި ރިޔާސީ އިންތިހާބުގެ ދެވަނަ ބުރާއި ދިމާކޮށް ޖުމްހޫރީ ޕާޓީން ވަކި ވުމަށްފަހު އޭނާ މިއަދާއި ޖެހެންދެންވެސް ހުރީ ވަކި ޕާޓީ އަކާއި ނުގުޅިއެވެ.
ރިޔާސީ އިންތިހާބުގެ ކެންޕެއިން ފެށުމުގެ ކުރިން އޭނާ ދެ އަހަރު ވަންދެން އިނގެރޭސިވިލާތަށް އަމިއްލައަށް އަރުވާލެވިގެން ހުއްޓެވެ. އިނގިރޭސި ވިލާތަށް އޭނާ ދިޔައީ ކުރީ ސަރުކާރުގެ ޓޫރިޒަމް މިނިސްޓަރު ކަމުގައި ހުރި އިރު، އެ މިނިސްޓްރީގެ އަންހެން މުވައްޒަފުންނަށް ޖިންސީ ފުރައްސާރަ ކުރި ކަމުގެ ބޮޑެތި ތުހުމަތު ތަކާއިއެކު އޭގެ ދައުވާ އުފުލަން ކޯޓަށްވެސް ފޮނުވާފައި ވަނިކޮށް ބޭސް ފަރުވާ އަށް ކަމަށް ބުނެއެވެ.
އޭރު ޕީޖީ އޮފީހުން ވަނީ ރޭޕް ކުރަން އުޅުމާއި ޖިންސީ އަނިޔާކުރުމާއި ޖިންސީ ގޯނާ ކުރުމާއި ބޭއަދަބީ ގޮތުގައި ޖިންސީ ގުނަވަން ހާމަކުރުމާއި ހުއްދަ ނޫން ޖިންސީ މުއާމަލާތެއް ހިންގުމުގެ ކުށުގެ ދައުވާ އޭނާގެ މައްޗަށް އުފުލާފައެވެ.
ނަމަވެސް ހެކި ނެތް ކަމަށް ބުނެ އެ ދައުވާތައް ވަނީ އަލުން އަނބުރާ ގެންގޮސްފައެވެ.
Advertisement
This content is created and paid for by advertisers and does not involve Voice Journalists
