ބެންކޮ އޮފް މޯލްޑިވްސް (ބީއެމްއެލް) ގެ އެހީގައި އިމާދުއްދީން ސްކޫލުގައި ތެރަޕީ ރޫމެއް ގާއިމުކޮށްފިއެވެ.

އިމާދުއްދީން ސްކޫލުގައި ކިޔަވާ ދަރިވަރުންގެ ތެރެއިން އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ހާއްސަކޮށް ތަރައްގީ ކުރި ރޫމް އެ ސްކޫލްގެ ޖުވެލް ސެންޓަރުގެ 130 އަށް ވުރެ ގިނަ ދަރިވަރުން ބޭނުން ކުރާނެ ކަމަށް އެ ސުކޫލުން މައުލޫމާތު ދެއެވެ. 

އަދި މި ރޫމަކީ އުނގެނުމުގައި ހާއްސަ އެހީއަށް ބޭނުންވާ ކުދިން އެ ކުދިންގެ ގާބިލްކަން އިތުރުކޮށް، ސްޕީޗް ތެރަޕީ އާއި އޮކިއުޕޭޝަނަލް ތެރަޕީވެސް ދިނުމަށް ހާއްސަ ބައެއް ހިމަނައިގެން ތައްޔާރުކުރެވިފައިވާ ރޫމެއް ކަމަށްވެސް ބުނެފައިވެއެވެ. 

Advertisement

މިއީ ބީއެމްއެލްއިން މުޖުތަމައަށް އެހީވުމަށް ބޭންކުން ކުރާ އިންވެސްޓްމަންޓްގެ ދަށުން ތަރައްގީ ކުރި ތަނެއް ކަމަށް އެ ކުންފުނިން ބުނެފައިވެއެވެ.

ބީއެލްއެލް އިން ވަނީ ފާއިތުވި ހަތަރު އަހަރު ރާއްޖޭގެ އެކި ހިސާބުތަކުގެ 40 ސްކޫލަކަށް ސްޕެޝަލް އެޑިއުކޭޝަން ނީޑް ކްލާސްތަކުގައި ކިޔަވަމުންދާ ދަރިވަރުންނަށް ކިޔެވުމަށް ބޭނުންވާ އާލާތްތައް ހަދިޔާކޮށްފައެވެ. އަދި ބޭންކުން ވަނީ އަތޮޅުތެރޭގެ ސްކޫލުތަކުގެ ކޮންޕިއުޓާ ލެބް ތަރައްގީކުރުމަށްވެސް އެހީތެރިކަން ފޯރުކޮށްދީފައެވެ.