ނިމިދިޔަ ރިޔާސީ އިންތިހާބުގައި ވާދަކުރެއްވި ފަސް ކެންޑިޑޭޓަކާއި އެ ކެންޑިޑޭޓުންގެ ރަސްމީ އެޖެންޓުން އިލެކްޝަންސް ކޮމިޝަން (އީސީ) އިން ޖޫރިމަނާކޮށްފިއެވެ.

އީސީއިން މިއަދު ނެރުނު ނޫސްބަޔާނެއްގައި ބުނެފައިވަނީ މި 5 ކެންޑިޑޭޓުން ޖޫރިމަނާކުރީ ކުރިމަތިލެއްވި 8 ކެންޑިޑޭޓުންގެ މާލީ ބަޔާން އެ ކޮމިޝަނަށް ލިބި، އެ ބަޔާންތައް ކޮމިޝަނުން ދިރާސާކުރުމަށްފަހު އިންތިހާބުތަކާބެހޭ އާންމު ޤާނޫނުގައި ބަޔާންކޮށްފައިވާ ކަންކަން މި 5 ކެންޑިޑޭޓުންގެ މާލީ ބަޔާނުގައި ފުރިހަމަ ނުވާތީ ކަމަށެވެ.

އެގޮތުން ޖޫރިމަނާ ކުރި ކެންޑިޑޭޓުންނަކީ:

1. އުމަރު ނަސީރު، ހ. ދޮންޖޭމުގެ، މާލެ

2. ހަސަން ޒަމީލް، މއ. މާވެޔޮ ވިލާ، މާލެ

3. އަހުމަދު ފާރިސް މައުމޫން، މއ. ކިނބިގަސްދޮށުގެ، މާލެ

4. އިލްޔާސް ލަބީބް، ބުލޫސްކައި، ސ. ހުޅުދޫ

5. މުހައްމަދު ނާޒިމް، މ. ސީނުކަރަންކާގެ، މާލެ

މި 5 ކެންޑިޑޭޓުންކުރެ ކޮންމެ ކެންޑިޑޭޓަކު 20،000 ރުފިޔާ އަދި މި ކެންޑިޑޭޓުންގެ ރަސްމީ އިންތިހާބީ އެޖެންޓް 6000 ރުފިޔާއިން ވަނީ ޖޫރިމަނާކޮށްފައެވެ. އަދި މި ފައިސާ މިއަދުން ފެށިގެން 30 ދުވަހުގެ ތެރޭގައި އިލެކްޝަންސް ކޮމިޝަނަށް ދެއްކުމަށް ވެސް ވަނީ އަންގާފައެވެ.