ރައްޔިތުންގެ މަޖިލީހުގެ މެންބަރުންނާއި ރައީސުލްޖުމުހޫރިއްޔާ އާއި ސަރުކާރުގެ އިސްވެރިންގެ މުސާރަ ބޮޑު ކުރަން މަޖިލީހުގެ މާލިއްޔަތު ކޮމިޓީން ނިންމި ނިންމުމާއި ދެކޮޅަށް، މައިނޯރިޓީ ޕާޓީ، ދަ ޑިމޮކްރެޓްސް އިން ތްރީ ލައިން ރެޑް ވިޕެއް ނެރެފި އެވެ. 

ޑިމޮކްރެޓްސް އިން ތްރީ ލައިން ރެޑް ވިޕް ނެރުމަށްފަހު، އެކަމާއި ގުޅިގެން ނެރުނު ނޫސްބަޔާނެއްގައި ވަނީ، އިގުތިސޯދީ ހާލަތު މިހާ ނާޒުކު ހާލަތެއްގައި އޮތް އިރު، އަދި އަންނަ އަހަރަށް ފާސްކުރި ބަޖެޓުގައި ޑެފިސިޓު ފަންޑުކުރާނެ ގޮތެއް ކަށަވަރު ނުވާއިރު މުސާރަތައް ބޮޑުކުރާތީ ކަންބޮޑުވުން ފާޅުކޮށްފަ އެވެ.

އަދި މި ނިންމުމާ ދަ ޑިމޮކްރެޓްސްގެ ޕާލިމެންޓަރީ ގުރޫޕުން ދެކޮޅު ހަދާ ކަމަށް ވެސް އެ ބަޔާނުގައިވެ އެވެ.

"...ރާއްޖޭގެ އާއްމު ރައްޔިތުންގެ ދިރިިއުޅުުމުގެ ހާލަތާއި، އާއްމު މަސައްކަތްތެރިންނާއި ސިވިލް ސާވެންޓުންގެ މުސާރަ އާއި އުޖޫރަ، ހަރަދުގެ ނިސްބަތުން ނުހަރު ދަށުގައި ވަނިކޮށް، އަދި މިކަންކަން ހުރިނެތްގޮތް އެންމެ ރަނގަޅަށް އޮޅުންފިލައިތިބެމެ، ސަރުކާރުގެ ވެރިންނާއި ރައްޔިތުންގެ މަޖިލީހުގެ މެމްބަރުންނާއި ކުންފުނިތަކުގެ ވެރިންނާއި ހުރިހާ ސިޔާސީ މީހުންގެ މުސާރަތައް އިތުރަށް ބޮޑުކުރުމަށް މާލިއްޔަތު ކޮމިޓީއަށް ފެނިލެއްވިކަމީ ނުހަނު ލަދުވެރި އަދި އެހާމެ ކަންބޮޑުވާ ކަމެއް،" ޑިމޮކްރެޓްސްގެ ބަޔާނުގައި ބުންޏެވެ.

މިއާއެކު ޑިމޮކްރެޓުން ވަނީ މަޖިލީހާއި މާލިއްޔަތު ކޮމިޓީގައި ބޮޑު އަގުލަބިއްޔަތެއް އޮތް އެމްޑީޕީގެ ޕާލިމެންޓަރީ ގްރޫޕުގެ ނިންމުންތައް ނިންމާއިރު މިއަށްވުރެ ޒިންމާދާރުވުމަށް ގޮވާލާފައެވެ.

މަޖިލިސް މެންބަރުންގެ މުސާރަ ބޮޑު ކުރިޔަ ނުދެއްވާނެ ކަމަށް ޑިމޮކްރެޓްސް ގެ ޕީޖީ ލީޑަރު ޢަލީ ޢާޒިމް ވެސް ވަނީ ވިދާޅުވެފަ އެވެ. 

އަދި ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ މުސާރަ ބޮޑު ކުރުމާއި ސަރުކާރުން ވެސް ވަނީ ދެކޮޅު ހަދާފައެވެ.