ރަށް ރަށުގެ ގެސްޓް ހައުސް ތަކަށް ޒިޔާރަތްކުރާ ފަތުރުވެރިންގެ ފަރާތުން ފެންނަމުންދާ އިޖުތިމާޢީ މިންގަނޑާައި ޚިލާފް ކަންކަން ހުއްޓުވުމަށް ފުލުހުންނާ ގުޅިގެން މަސައްކަތް ތަކެއް މިހާރު ވެސް ކުރަމުންދާ ކަމަށް ސިޓީ ތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެ އެވެ. 

މިއަދު ބޭއްވި ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަށް ޖަވާބު ދެއްވަމުން، އާދަމް ޝަރީފް ވިދާޅުވީ ރަށްރަށް ބާރުވެރި ކުރެވޭނީ، ރަށްރަށަށް އާމްދަނީ ލިބޭނެ ގޮތްތައް އިތުރުކޮށް, އެ ރަށްރަށަކީ ފުދުންތެރި ރަށްރަށަަށް ހެދިގެން ކަމަށެވެ. 

އެގޮތުން ލޯކަލް ޓޫރިޒަމަކީ ރަށްރަށުގައި ހިންގިދާނެ އެއް މަސައްކަތް ކަންވެސް ޝަރީފް ފާހަގަކުރެއްވި އެވެ. 

Advertisement

އެހެން ނަމަވެސް، އެގޮތުގެ މަތިން ޒިޔާރަތްކުރާ ފަތުރުވެރީންނަކީ ދިވެހީންނާއި މުސްލިމުންގެ މުޖުތަމަޢުއަށް ފެތޭ ވައްޓަފާޅި އަކަށް ނުވާއިރު، އެކަމުގެ ސަބަބުން މުޅި މުޖުތަޢުއަށް ލިބޭ ގެއްލުންތައް ކުޑަ ކުރުމަށްޓަކައި ކައުންސިލް ތަކުން މަސައްކަތް ތަކެއް ކުރަންޖެހޭ ކަން ޝަރީފް ފާހަގަކުރެއްވި އެވެ. 

މިއާއެކު ޝަރީފް ވިދާޅުވީ ރާއްޖޭގެ ގިނަ ކައުންސިލް ތަކުން ފަތުރުވެރިން އިޖްތިމާޢީ މިންގަނޑާ ޚިލާފުވާ މައްސަލައާއި ގުޅިގެން ހަރުދަނާ އުސޫލުތައް ހަމަޖައްސައި، ހަރުދަނާ ފިޔަވަޅުތައްވެސް އަޅަމުންދާ ކަމަށެވެ. 

ޝަރީފް އިތުރަށް ވިދާޅުވީ، ފަތުރުވެރިންގެ އެފަދަ މައްސަލަ ތަކުގައި، ކައުންސިލް ތަކުން، ކަންކަން ކުރަމުން އަންނަ ގޮތް، ކުރިއަށްވުރެ ރަނގަޅަށް މޮނީޓާ ކޮށް، އެކަމާއި ގުޅިގެން އަޅަންޖެހޭ ފިޔަވަޅުތައް އެޅުމުގައި ސަމާލުކަން ދެއްވާނެ ކަމަށެވެ. 

ލޯކަލް ޓޫރިޒަމާއެކު، ރާއްޖޭގައި މީހުން ދިރިއުޅޭ ބައެއް ރަށް ރަށުން، އާއްމު ތަން ތަނުގައި، އިޖުތިމާޢީ މިންގަނޑާައި ޚިލާފަށް ފަތުރުވެރިން ހެދުން އެޅުމާއި، އެފަދަ ޢަމަލުތައް ކުރުންވެސް އާއްމު ވެގެން ގޮސްފައިވާއިރު، އެ ރަށްރަށުގެ އާއްމުން އަންނަނީ އެކަމާއި ކަންބޮޑުވުން ފާޅުކުރަމުންނެވެ.