އިސްލާމީ ލައިބްރަރީއެއްވެސް ހިމެނޭހެން އިސްލާމިކް މިނިސްޓްރީގެ އާ ވެބްސައިޓް އަންނަ މަހު ލޯންޗް ކުރަން ނިންމާފައިވާ ކަމަށް، މިނިސްޓަރު ޑރ. މުޙައްމަދު ޝަހީމް އަލީ ސައީދު އިއުލާން ކުރައްވައިފިއެވެ.
ޝަހީމް އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ އާ ވެބްސައިޓާއެކު މިހާތަނަށް މިނިސްޓްރީން ނެރެފައިވާ އިސްލާމީ ފޮތްތައް ޑައުންލޯޑް ކުރެވޭނެ ހެން އިސްލާމީ ލައިބްރަރީ ބައެއް ވެސް ވެބްސައިޓްގައި ޤާއިމުވެފައި ހުންނާނެ ކަމަށެވެ.
މީގެ އިތުރުން ވެސް މިނިސްޓަރު ކުރެއްވި އިތުރު ޕޯސްޓެއްގައި ވަނީ އިލްމު އުނގެނޭ ލޯފަން ކުދިންނަށް ރެފެރެންސް ފޮތްތައް ފަހިކުރުމުގެ ގޮތުން މިނިސްޓްރީނާއި އައިޔޫއެމުން މިހާތަނަށް ތައްޔާރުކޮށްފައިވާ ފޮތްތަކުގެ އޯޑިއޯ ބުކް ނެރެން ނިންމާފައިވާ ކަން އިއުލާން ކުރައްވާފައެވެ.
މިނިސްޓަރު ވިދާޅުވީ އެ މަޝްރޫއު ތަންފީޒު ކުރާނީ އައިޔޫއެމްއިން ކަމަށާއި ނަމަވެސް އެކަމަށް ބޭނުންވާ ހޭދަ ކުރާނީ އިސްލާމިކް މިނިސްޓްރީން ކަމަށެވެ.
މިކަން ކަމުގެ އިތުރުން ކޮންމެ ހުކުރު ދުވަހަކު ރާއްޖޭގެ މިސްކިތްތަކުގައި ޚުތުބާ ދޭ ވަގުތު، މިސްކިތްތަކުގެ ޓީވީތަކުން އިނގިރޭސި ބަހުން ސަބްޓައިޓަލް އެރުވުމާއި، އިޝާރާތުން ޚުތުބާ ކިޔައިދޭތަން ދެއްކުމުގެ މަސައްކަތް ކުރަމުން އަންނަކަންވެސް މީގެ ކުރިން މިނިސްޓަރ ވަނީ އިއުލާން ކުރައްވާފައެވެ.
ހަމަ އެހެންމެ، ހުކުރު ޚުތުބާގެ ތަރުޖަމާ އެކި ބަސްބަހުން އޮންލައިންކޮށް ކިޔޭ ގޮތް ހެދުމަށް ވަނީ ނިންމައިފައެވެ.
Advertisement
This content is created and paid for by advertisers and does not involve Voice Journalists
