ޒަމާނީ ފެންވަރަށް ތަރައްޤީ ކުރަމުންދާ އަމީނީ މަގުގެ މަސައްކަތް ނިމުމާއެކު، މާލެއަށް ދިމާވެފައިވާ ފެންބޮޑުވުމުގެ މައްސަލަތަކަށް ޖުމުލަ ހައްލެއް ލިބިގެންދާނެ ކަމުގައި އެ މަސައްކަތުގެ ކޮންޓްރެކްޓަރ ރޯޑް ޑިވޮލޮޕްމަންޓް ކޯޕަރޭޝަން (އާރޑީސީ)ން ބުނެއްޖެއެވެ.
އަމީނީމަގުގެ ފަހު ފިޔަވަހީގެ މަސައްކަތާއި ގުޅުންހުރި ފަހުގެ އަދާހަމަ ހިއްސާކޮށް އެ ކުންފުނިން ކުރި ޓުވީޓެއްގައި ބުނެފައިވަނީ، އެ މަސައްކަތުގެ ދަށުން މިހާރު ބެހެއްޓިފައި ހުރި ސްޓޯރމް ވޯޓަރ ޕަމްޕްތައް އަޕްގްރޭޑް ކުރެވިގެންދިއުމަކީ އެ މައްސަލައަށް ހައްލު ލިބިގެންދާނެ ކަމެއްކަމުގައެވެ.
މީގެ އިތުރުން އާރޑީސީން ބުނެފައިވަނީ، އަމީނީމަގުގައި މިވަގުތު ކުރިއަށް ދަނީ ކާރބް ސްޓޯން ޖެހުމާއި ނަރުދަމާ އައުޓް ފޯލް ހޮޅި އެޅުމުގެ މަސައްކަތުގެ އިތުރުން ދުވާރުގެ މަސައްކަތްކަމަށެވެ.
އަމީނީމަގުގެ ފަހު ފިޔަވަހި ފިޔަވައި އެހެން ފިޔަވަހި ތަކުގެ މަސައްކަތް ކުރީގެ ސަރުކާރުގައި ކުރިއަށް ގެންދިޔަ ނަމަވެސް ފަހު ފިޔަވަހީގެ މަސައްކަތާއި ހަމައިން އެ މަޝްރޫޢު ވަނީ މެދުކެނޑިފައެވެ.
އެހެންނަމަވެސް ރައީސް ޑރ މުއިއްޒު ވެރިކަމަށް ވަޑައިގެންތާ ކުޑަ ދުވަސްކޮޅެއްގެ ތެރޭގައި އަމީނީ މަގުގެ ފަހު ފިޔަވަހީގެ މަސައްކަތް ފަށައިގެން ވަނީ ކުރިއަށް ގެންދަން ފަށައިފައެވެ. އެގޮތުން އެ މަޝްރޫޢު 50 ދުވަހުގެ ތެރޭގައި ނިންމުމަކީ އަމާޒެއްކަމުގައި މަސައްކަތުގެ ކޮންޓްރެކްޓަރ އާރޑީސީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
