އެކި މުނާސަބަތާއި ގުޅުވައި ހަމަހިމޭންކަމުގެ ސުކޫންތު ގެނައުމަކީ ކާފަރުންގެ ވައްޓަފާޅި އެއް ކަމަށް، އެކަން މުސްލިމުންނަށް ހުއްދަ ވެގެން ނުވާނެ ކަމަށް، ރާއްޖޭގެ ފުންނާބުއުސް ދީނީ ޢިލްމުވެރިޔާ އައްޝެއިޚު އަހުމަދު ސަމީރު ވިދާޅުވެއްޖެއެވެ.
ރޭ "ދާރިސް" ޓީވީ އިން ގެނެސްދިން ޢިލްމީ ޚަޒާނާ ޕްރޮގްރާމްގައި އެހުންތެރިއަކު އެކަމާއި ގުޅިގެން ކުރި ސުވާލަށް ޖަވާބު ދެއްވަމުން ޝެއިޚް ސަމީރު ވިދާޅުވީ، ސުކޫތު ގެނައުމަކީ އިސްލާމްދީނުގެ އެއްވެސް ޝިޢާރަކާއި ގުޅިގެން ކުރަން ވާރިދުވެފައިވާ ކަމެއް ނޫން ކަމަށެވެ.
އަދި އެފަދައިން ވަކި ކަމަކަށް ހުއްޓި ހުރުމަކީ ޣައިރު މުސްލިމުންގެ ސަގާފަތުގައި ހިމެނޭ ކަމެއް ކަމަށާ، އެއީ އިސްލާމްދީނުގެ ތެރޭގައި ހިމެނޭ ކަމެއް ނޫން ކަމަށް ސަމީރު ވިދާޅުވި އެވެ.
ސުކޫތު ގެނައުމަކީ ހުއްދަ ކަމެއް ނޫން. އެއީ ސުކޫތަކީ އަޅުގަނޑުމެންގެ، އިސްލާމްދީނުގެ އެއްވެސް ޝިއާރެއްގެ ތެރޭގައި، ހިތާމައަކާއި ހިތްދަތި ކަމަކާ، އެއްވެސް ކަމަކާ ގުޅިގެން ކުރުން ވާރިދުވެފައި އޮންނަ ކަމެއް ނޫން. އަދި އެއީ ވަކި ކަމަކަށް މީގާ ހުއްޓި، މަޑު މޮޅިވެ، ހަމަހިމޭންވެ، އެގޮތަށް ހުރުމަކީ އަޅުގަނޑުމެންގެ އިސްލާމްދީނުގެ ސަގާފަތުގެ ތެރޭގައި ހިމެނޭ ކަމެއް ނޫން. އަދި ކިއެއްތޯ، ޣައިރު މުސްލިމުންގެ، ޔަހޫދީންނާ ނަޞާރާއިންގެ ވައްޓަފާޅީގެ ތެރޭގައި ހިމެނޭ ކަމެއް.
އައްޝެއިޚް އަހުމަދު ސަމީރު
ޝެއިޚް ސަމީރު އިތުރަށް ވިދާޅުވީ، ސުކޫންތު ގެނައުމަކީ އޭގައި އެއްވެސް ފައިދާއެއް ނެތް، ބޭކާރު ކަމެއް ކަމަށެވެ. އަދި އެއީ ދުނިޔޭގެ ހުރިހާ ގައުމެއްގެ، ހުރިހާ ދީނެއްގެ މީހުންނަށް ބައިވެރިވެވޭނެ "ރޫހާނީ" ކަމެއް ކަމަށް ބެލެވޭ ކަމަށް ޝެއިޚް ވިދާޅުވި އެވެ.
އެހެންވީމާ އަޅުގަނޑަށް ބެލެވޭ ގޮތުގައި، އެއްވެސް ހާލެއްގައި، އެއްވެސް ކަމަކާއި ގުޅިގެން، އެންމެން އެކުވެގެން ތިބެ ސުކޫންތު ގެނައުމަކީ އެއީ ދީނީ ގޮތުން ކޮށްގެން ވާނެ ކަމެއް ނޫން
އައްޝެއިޚް އަހުމަދު ސަމީރު
ޝެއިޚް މިފަދައިން ވިދާޅުވެފައި ވާއިރު، ސުކޫންތު ގެނައުމަކީ ދިވެހިރާއްޖޭގައިވެސް ކުރަމުން އަންނަ ކަމެއް ކަން ފާހަގަކޮށްލަންޖެހެއެވެ. އެގޮތުން، ކޮންމެ އަހަރެއްގެވެސް ޑިސެންބަރ 26 ގައި އަންނަ އެއްބައިވަންތަ ކަމުގެ ދުވަސް ފާހަގަކުރާއިރު، 2004 ވަނަ އަހަރުގެ އެ ދުވަހުގައި ކުރިމަތިވި ސުނާމީ ކާރިސާގައި ދުނިޔެ ދޫކުރި މީހުންގެ ހަނދާން ކުރުމަށް ކަމަށް ބުނެ ސަރުކާރުގެ ހުރިހާ މުއައްސަސާއަކުން އެކަން ކުރެއެވެ.
އަދި ރައްޔިތުންގެ މަޖިލީހުގެ ތެރޭގައި ވެސް، މެންބަރުން ދުނިޔެ ދޫކުރުމާއި، އެނޫންވެސް ދިމާވާ ބައެއް ހިތާމަ ތަކާއި ގުޅުވައިގެން ސުކޫންތު ގެނެސް އުޅެއެވެ.
Advertisement
This content is created and paid for by advertisers and does not involve Voice Journalists
