އެފްއޭއެމުން އިއުލާންކޮށްފައިވާ އެ އެސޯސިއޭޝަން އިންތިޚާބުގައި, އެ އެސޯސިއޭޝަންގެ ރައީސް ކަމަށް، ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ވާދަ ކުރައްވަން ނިންމަވައިފި އެވެ. 

މިއީ އެފްއޭއެމްގެ ރައީސްކަމަށް ޓޮމް ވާދަކުރައްވާ ތިން ވަނަ ފަހަރެވެ. ތޯރިގު ފޯމު ހުށައެޅުއްވީ އެއްވަނަ ޑިވިޒަންގެ ތިން ޓީމު ކަމަށްވާ މާޒިޔާ އާއި ވެލެންސިއާ އަދި ޓީސީގެ ރުހުމާ އެކުގަ އެވެ.

މިކަމާއި ގުޅިގެން ޠާރިގު ކުރައްވާފައިވާ ޕޯސްޓެއްގައި އޭނާ ވަނީ، އެފްއޭއެމްގެ އިންތިޚާބުގައި ވާދަކުރެއްވުމަށް މިހާރު ފޯމު ހުށަހަޅުއްވާފައިވާ ކަމަށެވެ. 

Advertisement

ޓޮމް ވަނީ އޭނާ ހުށަހަޅުއްވާ އެ އެސޯސިއޭޝަންގެ އެގްޒެކްޓިވް ކޮމިޓީ އެކުލަވާލައްވާނެ ގޮތްވެސް އެ ޕޯސްޓުގައި ހާމަ ކުރައްވާފައެވެ. 

އެގޮތުން، ނައިބު ރައީސުންގެ ގޮތުގައި ހިމެނެނީ ރާއްޖޭގައި މިހާތަނަށް އުފެދުނު އެންމެ މޮޅު ގޯލްކީޕަރު އަދި ޓޮމް އާއި ދެބެންގެ ދެދަރި ބޭބެ ކަމަށްވާ އިމްރާން މުހައްމަދު އާއި މާޒިޔާގެ ހުސެއިން ޝާފިއު އެވެ.

މެންބަރުންގެ ގޮތުގައި ތިއްބެވި ބޭފުޅުންގެ ތެރޭގައި، އެފްއޭއެމްގެ ޖެނެރަލް ސެކްރެޓަރީކަން ދިގު މުއްދަތެއްގައި ކުރެއްވި އަބްދުލްހަމީދު އަބްދުލް ޤަފޫރާއި، ގައުމީ ޓީމުގެ މެނޭޖަރެއްގެ ގޮތުންނާއި އެފްއޭއެމްގެ ފުރަތަމަ އިންތިހާބުގެ ކުރިން އެ އިދާރާ ހިންގި އިންޓަރިމް ކޮމިޓީގެ ރައީސްކަން ކުރައްވައިފައިވާ އަހުމަދު ޝާހިރު ހިމެނެއެވެ. 

މީގެ އިތުރުން، މަހިބަދޫ ސްޕޯޓްސް ކްލަބަށް ނިސްބަތްވާ ޓޮމްގެ އެއްބަނޑު އެއްބަފާ ކޮއްކޮ، ޢުލާ އިބްރާހީމް އާއި، ޓީސީގެ މުހައްމަދު މިފްތާހު އާއި އަލީ ރިޒްވާން އަދި އަބްދުالله ނާސިހް ވެސް ހިމެނެއެވެ. 

އެފްއޭއެމްގެ އާ އިންތިހާބު 31 ޖެނުއަރީ 2024ގައި ބާއްވަން ހަމަޖައްސައި، ވާދަކުރަން ބޭނުން މީހުންނަށް ފުރުސަތު ހުޅުވާލާފައި ވަނީ މިއަދުގެ މެންދުރު ފަހު 2:00އާ ހަމައަށެވެ.