މިވަގުތު ރައްޔިތުން މަޖިލިހުގެ މެޖޯރިޓީ އެމްޑީޕީއަތުގައި އޮތް ނަމަވެސް އޭގެ ތެރޭގައި ތިއްބެވި ބައެއް މެމްބަރުންނަކީ އަދުގެ ރައީސުލް ޖުމުހޫރިއްޔާއަށް ތާޢިދުކުރައްވާ ބޭފުޅުންކަމަށާއި، ނަމަވެސް މި ސަރުކާރާއި އެއްކޮޅަށް ސީދާ ނުކުންނެވުމަށް ކެރިވަޑައި ނުގަންވާ ބޭފުޅުންކަމަށް ރައީސުލް ޖުމުހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މިފަދައިން އެމަނިކުފާނު ވިދާޅުވެފައިވަނީ ޕްރޮގްރެސިވް ކޮންގްރެސް ކޯލިޝަނުން ދަރުބާރުގޭގައި މިރޭ ބޭއްވި ބޮޑު ޖަލަސާގައި ވާހަކަފުޅު ދައްކަވަމުންނެވެ.

މިޖަލްސާގައި ރައްޔިތުންގެ މަޖިލީހުގައި އެމްޑީޕީ ތަމްސީލްކުރެއްވި 13 މެންބަރަކު ވަނީ ވެރިކަންކުރާ ޕާރޓީ ޕީއެންސީއާ މިރޭ ގުޅިވަޑައި ގަންނަވައިފައެވެ.

މި 13 މެމްބަރުންގެ މެމްބަރޝިޕް ފޯމާއި ހަވާލުވެ ވަޑައިގެންނެވުމަށް ފަހު ވާހަކަފުޅު ދައްކަވަމުން ރައީސް ވިދާޅުވީ މިސަރުކާރަށް ތާއީދުކުރި ނަމަވެސް ފާޅުގައި ނުކުންނަވަން ކެރިވަޑައިނުގަންނަވާ އެމްޑީޕީ ބައެއް މެންބަރުން އަދިވެސް މަޖިލިހުގައި އެބަތިއްބެވި ކަމަށެވެ.

މިކަން ފާހަގަކުރައްވާ ރައީސް ވަނީ އެފަދަ މެމްބަރުންނަށް ދަޢުވަތެއްވެސް ދެއްވާފައެވެ.

މިރޭގެ ޖަލްސާގައި ރައީސްވަނީ އެމަނިކުފާނުގެ މެނިފެސްޓޯގައި ހިމެނޭ ކަންތައްތައް ތަކުރާރުކުރައްވާ އެކަންތައްތައް ހާސިލްކުރެއްވުމަށް ކުރައްވަމުންގެންދަވާ މަސައްކަތްޕުޅުތައް ވިދާޅުވެދެއްވާފައެވެ. އަދި މިރޭ ޕީއެންސީ އާއި އަލަށް ގުޅިވަޑައިގެންނެވި އިއްޒަތްތެރި މެމްބަރުންނާއިއެކު އާހިތްވަރެއްލިބި އުންމީދު އާވެގެން ހިގައްޖެކަމަށް ވިދާޅުވެފައެވެ.

މިރޭ އެމްޑީޕީ ދޫކުރައްވާ 13 މެމްބަރަކު ޕީއެންސީ އާއި ގުޅުމާއިއެކު އެމްޑީޕީއަށް އެކަނި މިޖިލިހުން ރައީސް އަޒުލްކުރުމުގެ ބާރު ކެނޑިގެންދިޔައީއެވެ.