ދިވެހީންގެ ރާއްޖެއަށް ވާސިލް ވުމަށް ކުރެއްވީ އުނދަގޫ ދަތުރުފުޅެއް ކަމަށާޒ އެ ދަތުރު ކުރެއްވި އިރު، ތިއްބޭވީ ފިނި ކޮޓަރީގައި ނޫން ކަމަށް ޕީޕީއެމްގެ ނައިބު ރައީސް އަދި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މެންބަރުންގެ ތެރެއިން އިދިކޮޅު އެމްޑީޕީއަށް ނިސްބަތްވެވަޑައިގަންނަވާ 13 މެންބަރުން ޕީއެންސީއަށް ސޮއި ކުރުން ފާހަގަކުރުމުގެ ގޮތުން ދަރުބާރުގޭގައި ރޭ ކުރިއަށް ގެންދިޔަ ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ 2018 ވަނަ އަހަރުގައި ޕީޕީއެމްގެ ވެރިކަން ނިމުމަށްފަހު ކުރިމަތި ލައްވަން ޖެހިވަޑައިގެންނެވީ ވަރަށް އުނދަގޫ ދުވަސްތަކަކާ ކަމަށެވެ.
އަދި އެ ކުރިމަތި ދަތި އުނދަގޫ ތަކާއިއެކު ދިވެހީންގެރާއްޖެއަށް ދަތުރު ފެއްޓެވީ ވަރަށް މަދު މެންބަރުންނާއި އެކުކަންވެސް ޝިޔާމް ފާހަގަކުރެއްވި އެވެ.
އަޅުގަނޑުމެންނަށް އެނގޭ ޤައުމު ޙާލަތު އޮތްގޮތް. ގައުމުގެ މިސްރާބު އޮތް ގޮތް. އެނގޭތީވެ ގައުމުގެ ހައްގުގައި އެދުވަހު ހަތަރު ފަސް ރައްޔިތުންނާ އެކީގައި އެ މަސައްކަތް އަޅުގަނޑުމެން ކުރީ. އަޅުގަނޑުމެން ތިބީ އެ މަސައްކަތް ކުރަން ފިނި ކޮޓަރިއަކު ނޫން. އަޅުގަނޑުމެން އެ މަސައްކަތްތައް ކުރީ މަގުމަތީގައި އަޅުގަނޑުމެންގެ ބޭބޭފުޅުން އެ މަސައްކަތް ކުރީމާ ޖަލަށްލީ. ފިނި ކޮޓަރިއަކު ނޫން އަޅުގަނޑުމެން ތިބީ. ފިނި ކޮޓަރީގައި ނުތިބީމާ މިއަދު އިރާދަކުރެއްވީތީ ދިވެހީންގެ ރާއްޖެއަށް ދިވެހީންނާއެކީގައި މިއަދު އާދެވިފައި މިތިބީ.
މިނިސްޓަރު އަހުމަދު ޝިޔާމް
ޝިޔާމް އިތުރަށް ވިދާޅުވީ، ރައީސުލްޖުމުހޫރިއްޔާ ޑރ. މުހައްމަދު މުޢިއްޒު އާއިއެކު ދިވެހީންގެރާއްޖެ އަށް އާދެވިފައިވާއިރު، އެމަނިކުފާނު ގެންގުޅުއްވަނީ ހިތްތިރިކަމުގެ ސިޔާސަތުކަމަށެވެ. އަދި އެމަނިކުފާނު މަސައްކަތް ކުރައްވަނީ ތަފާތު ފިކުރުތަކުގެ ބޭފުޅުންނަށްވެސް ޖާގަ ދެއްވައިގެން ކަމަށް ވިދާޅުވި އެވެ.
ޝިޔާމް ވިދާޅުވީ ރައީސް މުޢިއްޒުގެ ސަރުކާރުން ފަށްޓަވާފައި ވަނީ އުނދަގޫ ބުރަ މަސައްކަތެއް ކަމަށާއި، ދިވެހި ރައްޔިތުންގެ ޙައްޤުގައި ކުރައްވާ އެ މަސައްކަތްޕުޅުގެ އެމަނިކުފާނުގެ ފަހަތުގައި ހުންނަވާނެ ކަމަށެވެ.
Advertisement
This content is created and paid for by advertisers and does not involve Voice Journalists
