ފަތުރުވެރިކަމުގެ އަންނަ އަހަރުގެ އަމާޒަކީ ދެ މިލިއަން ފަތުރުވެރިން ރާއްޖެ ގެނައުން ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
ޕީއެސްއެމް އިން ރޭ ގެނެސްދިން "ރާއްޖެ މިއަދު" ޕްރޮގްރާމެއްގައި ވާހަކަ ދައްކަވަމުން ފަތުރުވެރިކަން ކުރިއެރުވުމަށް ކުރޮއަށް އޮތް އަހަރުގައި ކުރުމަށް ރޭވިފައިވާ ކަންކަމަށް އަލި އަޅުވާ ލައްވައި ވާހަކަ ދައްކަވަމުން ފައިސަލް ވިދާޅުވީ، އެންމެ މުހިންމު ކަމެއްގެ ގޮތަށް ކުރުމަށް ރޭވިފައިވާ ކަމަކީ ރާއްޖެއަށް ފަތުރުވެރިން އަންނަ ނިސްބަތް އިތުރު ކުރުން ކަމަށެވެ.
އަދި އެކަމަށްޓަކައި އެންމެ މުހިންމު މަސައްކަތެއް ކުރެވެނީ އެމްއެމްޕީއާރުސީ މެދުވެރިކޮށް ކަމަށްވާއިރު، އެމްއެމްޕީއާރުސީ އާއިއެކުވެސް ބައްދަލުވުންތައް ބޭއްވި މަޝްވަރާތައް ކުރެވިފައިވާ ކަމަށް ފައިސަލް ފާހަގަކުރެއްވި އެވެ.
އެގޮތުން, ކުރެވުނު މަޝްވަރާގެ ތެރެއިން އައު މާކެޓްތައް ހޯދައި، އަންނަ އަހަރު 2 މިލިއަން ފަތުރުވެރިން ގެނައުމަށް އަމާޒު ހިފާފައިވާ ކަމަށް އެބޭފުޅާ ވިދާޅުވި އެވެ.
އަޅުގަނޑުމެން ފޯކަސް މިކުރަނީ، އެގްޒިސްޓިން މާކެޓްތައް އިތުރަށް ފުޅާ ކުރެވޭނީ ކޮން ގޮތަކަށްތޯ؟ އެގޮތުން ރަޝިއަން މާކެޓަކީ ރާއްޖޭގެ ލީޑިން މާކެޓް. އެހެންވީމާ ވަރަށް ބޮޑަށް ރަޝިއަން މާކެޓަށް ފޯކަސް ކޮށްގެން ވަރުގަދަ މަސައްކަތް ކުރާނަން. އަދި އިތުރަށް ފަތުރުވެރިން ގެނެވޭނެ ގޮތްތައް ހޯދައި، ނިޔު މާކެޓްސް އެކްސްޕްލޯ ކޮށްގެން 2024 ވަނަ އަހަރު އަޅުގަނޑުމެންގެ އަމާޒަކީ 2 މިލިއަން ފަތުރުވެރިން ރާއްޖެއަށް ގެނައުން އެހެންވީމާ އިތުރު މާކެޓްތައްވެސް އަޅުގަނޑުމެން ހޯދަންޖެހޭ.
ޓޫރިޒަމް މިނިސްޓަރު އިބްރާހީމް ފައިސަލް
ފައިސަލް އިތުރަށް ވިދާޅުވީ، ފަތުރުވެރިންގެ އަދަދު އިތުރުކުރުމަށް އެމްއެމްޕީއާރްސީގެ ބަޖެޓު އިތުރުމަށް މަސައްކަތް ކުރައްވާ ކަމަށާއި އިތުރު މާކެޓުތަކަށް ރާއްޖެ އިސްތިހާރު ކުރެވޭނީ ބަޖެޓު އިތުރުކޮށްގެން ކަމަށެވެ. އަދި އެމްއެމްޕީއާރްސީއާ ގުޅިގެން އިތުރު މާކެޓުތަކަށް ވާސިލުވެ، ރާއްޖެ އިޝްތިހާރު ކުރުމަށް ގިނަ މަސައްކަތްތަކެއް އަންނަ އަހަރު ކުރައްވާނެ ކަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
