ގާނޫނު ގައިވާ ގޮތުގެ މަތީން ހުޅުމާލޭގެ މުނިސިޕަލް ޚިދުމަތްތައް މާލޭސިޓީ ކައުންސިލްގެ ދަށަށް ބަދަލުކޮށްފި އެވެ. 

މިކަން އިއުލާން ކުރައްވައި، ރައީސުލްޖުމުހޫރިއްޔާ ޑރ މުހައްމަދު މުޢިއްޒު މިރޭ ކުރެއްވި ޓްވީޓެއްގައި ވިދާޅުވީ، އެ ނިންމުން ނިންމާފައިވަނީ މިއަދުގެ ކެބިނެޓް ބައްދަލުވުމުގެ ތެރެއިން ކަމަށެވެ. އަދި 1 ޖަނަވަރީން (މާދާމާއިން) ފެށިގެން އެ ނިންމުން ތަންފީޒުކުރަން ފެށޭނެ ކަމަށްވެސް އެމަނިކުފާނު ވިދާޅުވި އެވެ. 

މިއާއެކު, ހުޅުމާލޭގެ މުނިސިޕަލް ޚިދުމަތްތައް ދޭ އޮފީސް ތަކާއި، އެ މަސައްކަތުގައި ހިމެނޭ މެޝިނަރީސް އަދި ސާމާނު ތަކާއި، މުނިސިޕަލް ބިން ތަކާއި، މުނިސިޕަލް މަސައްކަތް ކުރާ މުވައްޒަފުން، މާލެ ސިޓީ ކައުންސިލްގެ ބެލުމުގެ ދަށަށް ބަދަލު ކުރުމުގެ މަސައްކަތް ކުރިއަށް އޮތް އެއް މަސް ދުވަހުގެ ތެރޭގައި ކުރެވިގެންދާނެ ކަމަށް ރައީސުލްޖުމުހޫރިއްޔާ ވިދާޅުވި އެވެ. 

ރައީސް މުޢިއްޒު އިތުރަށް ވިދާޅުވީ، މާލެސިޓީ ކައުންސިލްގެ ބެލުމުގެ ދަށަށް ގެންނަ، މުނިސިޕަލް މަސައްކަތް ކުރާ ހުރިހާ މުވައްޒަފުންނަށްވެސް މިހާރު ލިބެމުންދާ މުސާރާ ކުރިއަށް އޮތް އެއް އަހަރު ދުވަހު ލިބެމުންދާނެ ކަމަށެވެ. 

އަދި އެކަމާއި ގުޅޭ އިތުރު ތަފްސީލް ފަހުން ހާމަކުރައްވާނެ ކަމަށް އެމާނިކުފާނު ވިދާޅުވި އެވެ. 

ހުޅުމާލެ ފުރަތަމަ ފިޔަވައްސާއި، ދެވަނަ ފިޔަވަހީގެ މައިގަނޑު މުނިސިޕަލް ހުރިހާ ޚިދުމަތެއް މިހާރު ދެމުން ގެންދަނީ އާބަންކޯއިންނެވެ.

ނަމަވެސް އެ ޚިދުމަތްތައް މާލޭ ސިޓީ ކައުންސިލުގެ ދަށަށް ބަދަލު ކުރުމަކީ ރައީސުލްޖުމުހޫރިއްޔާ ގެ ރިޔާސީ ވައުދުފުޅެކެވެ.