ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑްގެ ފަރާތުން މާލެ ސިޓީގެ ހުޅުމާލޭގައި ފޯރުކޮށްދެމުން ދިޔަ ރަށްވެހިކަމުގެ ޚިދުމަތްތައް މާލެ ސިޓީ ކައުންސިލުގެ ދަށަށް ބަދަލުކުރުމާއި ގުޅޭ ފަހުމުނާމާގައި މިއަދު ސޮއިކޮށްފިއެވެ.
މިނިސްޓްރީ އޮފް ފިނޭންސްގައި މިއަދު ބޭއްވި ޚާއްޞަ ރަސްމިއްޔާތެއްގައި މިނިސްޓްރީގެ ފަރާތުން ފަހުމުނާމާގައި ސޮއިކުރެއްވީ މިނިސްޓަރ އޮފް ފިނޭންސް ޑރ. މުޙައްމަދު ޝަފީޤެވެ. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަލްފާޟިލް އިބްރާހީމް ފަޒުލް ރަޝީދެވެ. އަދި މާލޭ ސިޓީ ކައުންސިލްގެ ފަރާތުން ސޮއިކުރެއްވީ އެކްޓިންގ މޭޔަރ އަދި ޑެޕިއުޓީ މޭޔަރ އަލްފާޟިލް އަޙްމަދު ނަރީޝެވެ.
މިއަދު މި ސޮއިކުރެވުނު ފަހުމުނާމާގެ ދަށުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ40 ވަނަ މާއްދާގެ (ހ) ގައި ބަޔާންކުރާ ރަށްވެހިކަމުގެ ޚިދުމަތްތަކުގެ ތެރެއިން އެޗްޑީސީގެ ފަރާތުން ހުޅުމާލޭގައި ދެމުންގެންދިޔަ ހުރިހާ ޚިދުމަތެއް މިއަދުން ފެށިގެން އެއްމަސްދުވަސްތެރޭ ހުއްޓަލައި އޭގެ ފަހުން އެ ޚިދުނަތްތައް ފޯރުކޮށްދޭން ޖެހޭނީ މާލޭ ސިޓީ ކައުންސިލްގެ ފަރާތުންނެވެ.
މީގެ އިތުރުން އެޗްޑީސީގައި ރަށްވެހިކަމުގެ ޚިދުމަތްތައް ފޯރުކޮށްދެމުންދާ މުވައްޒަފުންނާއި، ރަށްވެހިކަމުގެ ޚިދުމަތްތަކާއި ގުޅޭގޮތުން ތަރައްޤީކޮށްފައިވާ ބިންތަކާއި ޢިމާރާތްތަކާއި، އެކަމާ ގުޅޭ ވެހިކަލްތަކާއި، ޓޫލްސް އަދި އެކުއިޕްމަންޓްސް މާލޭ ސިޓީ ކައުންސިލާ ހިއްސާ ކުރަންޖެހެއެވެ.
އަދި މާލޭ ސިޓީ ކައުންސިލްގެ މަސައްކަތްތަކަށް ބޭނުންވާނެ ވޯކް ސައިޓް އަދި އޮފީސް ސްޕޭސް މިއަދުން ފެށިގެން ބާރަ މަސް ދުވަހުގެ މުއްދަތަށް އެ ކައުންސިލުން އަގެއް ނެގުމަކާ ނުލައި ޝެއާޑް ބޭސިސްއެއްގައި އެޗްޑީސީ އާއި މާލޭ ސިޓީ ކައުންސިލުން ބޭނުންކުރުމަށްވެސް މި ފަހުމުނާމާގެ ދަށުން ވަނީ އެއްބަސްވެފައެވެ.
ހުޅުމާލޭގެ މިނިސިޕަލް ޚިދުމަތްތައް މާލޭ ސިޓީ ކައުންސިލަށް ބަދަލުކުރުން މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.
Advertisement
This content is created and paid for by advertisers and does not involve Voice Journalists
