އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އައު ކޯލް ސެންޓަރެއް ޤާއިމްކޮށް ވުޒާރާއަށް ގުޅޭނެ އައު ނަންބަރެއް ތަޢާރަފް ކޮށްފިއެވެ. 

މިއަދު ގާއިމް ކުރެވުނު މި ކޯލް ސެންޓަރަކީ ލލ އެ ވުޒާރާގެ މަސައްކަތްތައް ހަރުދަނާކޮށް ޚިދުމަތްތައް ފުޅާކުރުމަށް ކުރާ މަސައްކަތުގެ ތެރެއިން ގާއިމް ކުރެވުނު ކޯލް ސެންޓަރެއް ކަމަށެވެ. އެ އިދާރާގެ ޚިދުމަތްތަކަށް އެދި ގުޅާ ފަރާތްތަކަށް ފަސޭހަކަމާއި އަވަސްކަމާއި އެކު ޚިދުމަތް ދިނުމަށް ޤާއިމްކޮށްފައިވާ ކޯލް ސެންޓަރުގެ އައު ނަންބަރަކީ 1433 އެވެ.

އިޖްތިމާއީ ވުޒާރާއިން ބުނީ، ކޯލް ސެންޓަރުގެ އައު ނަންބަރަކީ އެއިދާރާއިން މިހާރުވެސް ބޭނުން ކުރަމުންގެންދާ އިޖުތިމާޢީ ޚިދުމަތްތަކާއިގުޅޭ ހެލްޕްލައިން 1421 އަދި ކުޑަކުދިންނަށް ޚާއްސަކޮށްފައިވާ ހެލްޕްލައިން 1412ގެ އިތުރުން ތަޢާރަފުކުރެވުނު މުޅިން އައު ނަންބަރެއް ކަމަށެވެ.

Advertisement

އަދި 1421 އަދި 1412 އަކީ 24 ގަޑި އިރު ގުޅޭ ހެލްޕްލައިން ތަކަށް ވީނަމަވެސް 1433 ނަންބަރަކީ ކަނޑައެޅިފައިވާ ވަކި ގަޑިތަކެއްގައި ގުޅޭނެ ނަންބަރެއް ކަން ވެސް އެ އިދާރާއިން ފާހަގަކޮށްފައިވެއެވެ. 

މިގޮތުން އިޖްތިމާޢީ ވުޒާރާއިން ބުނީ، 1433 އަށް ސަރުކާރު ބަންދު ނޫން ކޮންމެ ދުވަހެއްގެ ހެނދުނު 08:30 އިން މެންދުރު 01:30 އަށް ގުޅޭނެ ކަމަށާ އަދި ކޯލު ނުނެގި ދާ ހާލަތްތަކުގައި ކޯލުގެ މަޢުލޫމާތު ވަކި ސިސްޓަމެއްގައި ރައްކާކުރެވި ތަރުތީބުން، އެފަދަ ކޯލުތަކަށް ކޯލްސެންޓަރުން ޖަވާބުދާރީވަމުން ގެންދާނެ ކަމަށެވެ. 

މި ބަދަލާއެކު ކޯލްސެންޓަރުގައި އެންމެ ޒަމާނީ ކޯލް މެނޭޖްމަންޓް ސިސްޓަމެއް ޤާއިމުކުރެވި، މިސިސްޓަމުގެ ޒަރީއާއިން ކޮންމެ ކޯލެއް ލޮގު ކުރެވި، ކަމާއިގުޅޭ ފަރާތްތަކާއި މަޢުލޫމާތު ހިއްސާކޮށް އާންމުންނަށް ދެވޭ ޚިދުމަތްތައް އިތުރަށް ހަރުދަނާ ވެގެން ދާނެކަން އިޖްތިމާޢީ ވުޒާރާއިން ފާހަގަކުރެއެވެ. 

އެހެން ކަމުން މިއަދުން ފެށިގެން އެ ވުޒާރާގެ ކޯލް ސެންޓަރަށް ގުޅޭނެ މައި ނަންބަރަކީ 1433 ކަމަށް އިޖުތިމާޢީ ވުޒާރާއިން ވަނީ ބުނެފައެވެ .