ރާއްޖެއަށް ބޮޑު އަދަދުން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދޭންޖެހޭ ކަމަށް ޕީއެންސީގެ ޓިކެޓްގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.
ރޭ ޕީއެސްއެމް އިން ގެނެސްދިން "މޭޔަރ ބަހުސް" ގައި ގޭންގް ތަކާއި މަސްތުވާތަކެތި ބޭނުން ކުރާ މީހުންގެ މައްސަލަ ހައްލު ކުރުމަށް ގެންގުޅުއްވާނެ ސިޔާސަތު ތަކާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ޢާޒިމާ ވިދާޅުވީ، އަނިޔާވެރި ކުށްތަކާއި، މަސްތުވާތަކެތީގެ މައްސަލަ އަކީ ރާއްޖޭގެ ޕީނިއޮލޯޖީގައި ހިމެނޭ ކަން ކަމެއް ނޫން ކަމަށެވެ. އަދި އެއީ ރާއްޖޭގައި އުފައްދާ އެއްޗެއް ނޫން ކަމަށް އޭނާ ވިދާޅުވި އެވެ.
އެހެން ކަމުން އެކަންކަން ހައްލު ކުރެވޭނީ ރާއްޖޭގައި ކުށުވެށި ބަދަލު ވަމުންދާގޮތް ބަލައި ދިރާސާ ކޮށްގެން ކަމަށް ޢާޒިމާ ވިދާޅުވި އެވެ.
އަޅުގަނޑުމެންގެ މަސައްކަތަށް ވާނީ ކުށުގެ ވެއްޓާއި އެއްގޮތަށް މައްސަލަތައް ހައްލު ކުރުން. ރާއްޖެއަށް ބޮޑެތި އަދަދު ތަކުގައި މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމާއި ގުޅޭ ވިސްނުން ސަރުކާރު ތަކުންވެސް ގެންގުޅެން އެބަޖެހޭ. އަދި ހަމައެއާއެކު ބޮޑެތި މައްސަލަ ތަކަށް ވެސް މަރުގެ އަދަބު ތަންފީޒުކުރަން ޖެހޭ
ޢާއިޝަތު ޢާޒިމާ ޝަކޫރު
މިއާއެކު ޢާޒިމާ ވިދާޅުވީ، ކުށުވެށި ކޮންޓްރޯލް ކުރުމުގެ މަސައްކަތް ފެށެންޖެހޭނީ ސުކޫލް ސިސްޓަމްގެ ތެރެއިން ކަމަށެވެ. އެހެނީ، ރާއްޖޭގައި، ކުދިން ކުށް ކުރަން ފަށާ އުމުރަކީ މިހާރު 8 އަހަރަށް ވެފައިވާ ކަމަށާ، އެއީ ކުދިންގެ ސުކޫލު ދުވަސް ވަރު ކަން އޭނާ ފާހަގަކުރެއްވިއެވެ.
ރޭ ބަހުސްގައި އާޒިމާ ވަނީ، މާލޭގެ މަގު ހެދުމުގެ މަސައްކަތާއި ގުޅޭ ޕްލޭން ވަރަށް އަވަހަށް އާއްމު ކުރައްވާނެ ކަން ހާމަ ކުރައްވާފައެވެ. އަދި ބުޅަލުގެ މައްސަލަ ހައްލު ކުރުމަށް ޕެޓް ޝެލްޓަރ އެއް ހަދައި، އެތަނުގައި ޖަނަވާރު ތަކަށް ފަރުވާދޭ ޑޮކްޓަރުން ބައިތިއްބަވާނެ ކަމަށްވެސް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
