ހުޅުމާލޭގައި ވިޔަފާރި ޒޯނެއް ހަދަން ޗައިނާގެ ހުނާން ކޮންސްޓްރަކްޝަން އިންވެސްޓްމަންޓް ގުރޫޕާ މިއަދު ހަވާލުކޮށްފި އެވެ.
50 މިލިއަން ޑޮލަރު (771 މިލިއަން ރުފިޔާ)ގެ މި މަޝްރޫޢުގެ އެއްބަސްވުމުގައި އާބަންކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ.
"ކޮމާޝަލް ސްޕައިން" ގެ ނަމުގައި ތަރައްގީ ކުރާ މި ވިޔަފާރި ޒޯން ގައި ހަތް އިމާރާތެއް ގުޅުވައިގެން އަޅާއިރު، އޭގެ ތެރެއިން ހަ އިމާރާތަކީ ކޮމާޝަލް އިމާރާތެވެ. އަދި އަނެއް އިމާރާތަކީ ސަޕޯޓިން ހިދުމަތްތައް ދޭން ހަދާ އިމާރާތެކެވެ.
އެތަންތަނުގައި ރީޓެއިލް ފިހާރަތަކާއި ވެލްނެސް ހިދުމަތްތަކާއި އެންޓަޓެއިންމެންޓް ހިދުމަތްތަކާއި ބޭންކިން ހިދުމަތްތައް ފޯރުކޮށްދޭނެ އެވެ.
ތިން ފަންގިފިލައާއި، ހަތަރު ފަންގިފިލާއަށް ތަރައްގީކުރާ މި އިމާރާތްތައް ފަރުމާކުރާނީ ރާއްޖޭގެ އިހުގެ އިމާރާތްތަކުގެ ފަރުމާކުރުންތައް ވެސް ރަމްޒުވާ ގޮތަށެވެ.
އަދި ގުޅުވާލައިގެން ހަދާ މި ހަތް އިމާރާތް ވާނީ އެ ސަރަހައްދުގެ އެންމެ ފާހަގަކޮށްލެވޭ އެއް ސްޓްރަކްޗާއަށް ކަމަށާ އެ އިމާރާތަށް "ސްޕައިން" ކިޔާފައިވަނީ އެ އިމާރާތްތައް ގުޅާލާފައިވާތީ ކަމަށް އާބަންކޯއިން ބުނެއެވެ.
އަދި މި މަޝްރޫއުގެ ސަބަބުން ހޫލުމާލޭގައި ހުރި ލޯކަލް ގެސްޓު ހައުސް ވިޔަފާރިތަކަށް ވެސް އެ ކަމުގެ ހެޔޮ އަސަރުކުރާނެ ކަމަށް އާބަންކޯއިން ބުނެއެވެ.
މީގެ އިތުރުން މަޝްރޫއު ނިންމުމަށްފަހު، ބޮޑެތި ބްރޭންޑްތަކާއި، ރާއްޖޭގެ ވިޔަފާރިތަކަށް ވެސް ފުރުސަތު ދިނުމަށްޓަކައި އާބަންކޯއިން އެ ތަންތަން ކުއްޔަށް ދޫކުރާނެ ކަަމަށްވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
