"އިސްލާމީ ރިސާލަތު" ނަމުގައި އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމްގެ ތެރެއިން ކޮލެޖް އަދި ޔުނިވަރސިޓީތަކަށް ޚާއްސަކޮށް ޢުމްރާ ދަތުރެއް ކުރިއަށްގެންދިޔުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން އިސްލާމީ ކަންތައްތަކާ ބެހޭ ވުޒާރާގެ އެސިސްޓެންޓް ޑައިރެކްޓަރ ޒީނާ މުޙައްމަދު ވިދާޅުވީ، އެ ވުޒާރާއިން ފެށުމަށް ހަމަޖެހިފައިވާ "ރިސާލަތު ޕްރޮގްރާމް 2024" ތެރެއިން ކޮލެޖް އަދި ޔުނިވަރސިޓީތަކުގައި ކިޔަވާ ދަރިވަރުންނަށް ޢަމާޒުކޮށް ޢުމްރާ ދަތުރެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
މި ޢުމްރާ ދަތުރަކީ ޔުނިވާސިޓީ އަދި ކޮލެޖް ތަކަށް އަމާޒުކޮށްގެން، އެ ތަންތަނުގައި ކިޔަވާ ދަރިވަރުން އުމްރާއަށް ގެންގޮސް، އެ އަޅުކަން ތަޖުރިބާ ކޮށްލުމުގެ ގޮތުން ރޭވިފައިވާ ޕްރޮގްރާމެއް ކަމަށް އޭނާ ވިދާޅުވި އެވެ.
"ޕްރޮގްރާމްގެ ދަށުން ކުރިއަށްގެންދިއުމަށް ހަމަޖެހިފައިވާ ޢުމްރާ ޓުއަރއަކީ ޒުވާން ޖީލަށް ހައްޖުގެ އަޅުކަމާއި ޢުމްރާގެ އަޅުކަން އަދާކުރާ ގޮތް ރަނގަޅަށް ފަޙުމްކޮށްދީ، ހައްޖު އަދި ޢުމްރާއަށް ލޯބި ޖެއްސުމުގެ ގޮތުން ކުރިއަށް ގެންދެވޭނެ ޕްރޮގްރާމެއް. އަދި ހައްޖު އަދި އުމްރާ އަކީ ދީނުގެ މުހިންމު އަޅުކަމަކަށް ވާ ނަމަވެސް އެ ފުރުސަތު ލިބެން ދަތި. އެހެން ވީމާ، ޓުއަރގެ ސަބަބުން ހައްޖު އަދި ޢުމްރާގެ މަތިވެރި އަޅުކަން ތަޖުރިބާ ކޮށްލުމުގެ ފުރުސަތު ދަރިވަރުންނަށް ލިބިގެންދާނެ."
އެސިސްޓެންޓް ޑައިރެކްޓަރ ޒީނާ މުޙައްމަދު
މީގެ އިތުރުން. މި ޢުމްރާ ދަތުރާއި ގުޅޭގޮތުން މަޢުލޫމާތު ހިއްސާ ކުރައްވަމުން، އިސްލާމީ ކަންތައްތަކާ ބެހޭ ވަޒީރުގެ ނައިބު އައްޝައިޚު މުޠީޢު އިސްމާޢީލް މުޙައްމަދު ވިދާޅުވީ، ޕްރޮގްރާމްގެ ދަށުން ހިންގުމަށް ހަމަޖެހިފައިވާ ޢުމްރާ ދަތުރަކީ ހަމައެކަނި ޢުމްރާ ދަތުރެއް ނޫންކަމަށާއި އޭގެ ތެރޭގައި ތަރުބަވީ ބައިތަކެއް ހިމެނިގެންދާނެ ކަމަށެވެ.
އެގޮތުން އިސްލާމީ ކަންތައްތަކާ ބެހޭ ވުޒާރާއިން ސަޢުދީ ޢަރަބިއްޔާގެ އިދާރާތަކާއި، މަޝްވަރާތައް ކޮށް، އާންމު ދަތުރުތަކުގައި ޒިޔާރަތް ނުކުރެވޭ ތަންތަނަށް ދަރިވަރުން ޒިޔާރަތް ކުރެވޭގޮތް ހެދިގެންދާނެ ކަމަށް ވަޒީރުގެ ނައިބު ވިދާޅުވި އެވެ.
"ޓުއަރގެ ތެރެއިން މައިދާންތަކަށް ޒިޔާރަތްކުރުމާއި، ނަބިއްޔާ މުޙައްމަދު ޞައްލަالله ޢަލައިހި ވަސައްލަމްގެ ސިޔަރަތާއި ގުޅޭ ކުތުބުޙާނާތަކަށް ޒިޔާރަތްކުރުން ފަދަ ބައިތައް ޢުމްރާ ޓުއަަރގެ ތެރޭގައި ހިމެނިގެން ދާނެ. މަޤްސަދަކީ ޢުމްރާ ޓުއަރގެ ތެރެއިން ދަރިވަރުންނަށް އިސްލާމީ ޙަޟާރަތާއި އިސްލާމްދީނާއި ބެހޭ މައުލޫމާތު ލިބިގެންދާ ތަރުބަވީ ޓުއަރއަކަށް ޓުއަރ ހެދިގެން ދިއުން."
ވަޒީރުގެ ނައިބު އައްޝައިޚު މުޠީޢު އިސްމާޢީލް މުޙައްމަދު
ކޮލެޖް އަދި ޔުނިވަރސިޓީ ތަކަށް ޢަމާޒުކޮށް މި ޢުމްރާ ދަތުރަށް ފުރުސަތު ލިބިގެންދާނީ މިނިސްޓްރީން ކަނޑައަޅާ ވަކި އުސޫލެއްގެ ތެރެއިން ހޮވާލެވޭ ދަރިވަރުން ކަމަށް ވަޒީރުގެ ނައިބު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
