ރާއްޖެއަށް މިހާރު ކުރަމުންދާ ވިއްސާރައިގައި، މަންޓާ އެއާގެ ބޯޓަކަށް ބޮޑު ގެއްލުންތަކެއް ވެއްޖެއެވެ.

މަންޓާ އެއާއިން ބުނީ މިހާދިސާ ހިނގާފައި ވަނީ މިދިޔަ ބުދަ ދުވަހު ކަމަށެވެ. އަދި ގެއްލުން ލިބުނު ބޯޓު އަޅާފައި އޮތީ މާލެ އަތޮޅުގެ ޕްލެޓްފޯމެއްގައި ކަމަށާއި، ސީޕްލޭނަށް ގެއްލުން ވެފައިވަނީ ފަޅުގައި އަޅާފައި އޮއްވާ ކަނޑުގަދަވުމުގެ ސަބަބުން ޕްލެޓް ފޯރމުގައި އައްސާފައި އޮތް ވާގަނޑު ކަނޑައިގެން ދިއުމުގެ ސަބަބުންކަމަށެވެ.

އަދި ލިބުނު ގެއްލުންތަކުގައި ރަށެއްގެ ގޮނޑުދަށަށް ބޯޓު ބީހިފައިވާކަމަށްވެސް ބުންޏެވެ.

މަންޓާއިން އިތުރަށް ބުނީ މި ހާދިސާގައި އެއްވެސް މީހަކަށް ގެއްލުންވެފައި ނުވާކަމަށާ ހަލާކުވި ބޯޓު މަރާމާތު ކުރުމުގެ މަސައްކަތް މިހާރު ކުރަމުންދާ ކަމަށެވެ.

މި ހާދިސާގެ ވީޑިއޯ މިހާރު މީސްމީޑިއާގައި އާއްމު ވެފައިވާއިރު، ވިއްސާރައިގެ ސަބަބުން އެ ސީޕްލޭންގެ ކުރީކޮޅު ވަނީ ވަރަށް ބޮޑަށް ހަލާކުވެފައެވެ. 

ރާއްޖެއަށް މިހާރު ކުރަމުން އަންނަ ވިއްސާރައަކީ މި ސަރަހައްދުގައި ދަތުރުކުރާ ކޮޅިގަނޑެއްގެ ސަބަބުން ކުރަމުންދާ ވިއްސާރައެއް ކަމަށް މެޓް އޮފީހުން ބުނާ އިރު، ވިއްސާރައިގެ ސަބަބުން ލިބިދާނެ ގެއްލުމަކަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.