އިންޑިއާ އިން ރާއްޖެ ހިފަން ޖެހޭކަމަށް ބުނެ މީގެ ކުރިންވެސް މީސް މީޑިއާގައި އަޑުއުފުލި އެ ގައުމުގެ ގާނޫނު ހަދާ މަޖިލީހުގެ ކުރީގެ މެންބަރު އަދި ވަޒީރުކަން ވެސް ކޮށްފައިވާ ސިޔާސީ ގޮތުން ނުފޫޒު ގަދަ ސުބްރަމާނިޔަމް ސްވާމީ، އަނެއްކާވެސް އިންޑިޔާއިން ރާއްޖެ ހިފުމަށް ހިތްވަރުދީފިއެވެ. 

ރާއްޖޭގައި ތިބި އިންޑިއާ ސިފައިން މާޗް 15ގެ ކުރިން ގެންދިޔުމަށް ސަރުކާރުން ރަސްމީކޮށް އިންޑިޔާގައި އެދުމާއި ގުޅިގެން ކުރި ޓުވީޓެއްގައި ސުބްރަމާނިޔަމް ވަނީ، ރާއްޖޭގައި ތިބި އިންޑިއާ ސިފައިން ގެންދިއުމަށް ދިވެހި ސަރުކާރުން ދީފައިވާ މުހުލަތަށް، އިންޑިއާ ސަރުކާރުން އަމަލުކުރައްވާނެތޯ ސުވާލު ކޮށްފައެވެ. 

އެގޮތުން ރާއްޖޭގެ އެ އެންގުމާއެކު ބޮޑުވަޒީރު މޯދީގެ ސަރުކާރުން އިންޑިއާގެ މޫނުމަތީ ތަފާލެއް ޖަހާނީތޯ ސްވާމީ ވަނީ ސުވާލު އުފައްދާފައެވެ.

Advertisement

ބެލެވޭ ގޮތުގައި ރާޖީވް ގާންދީގެ ވެެރިކަމުގައި އިންޑިއާ ސިފައިންތަކެއް ރާއްޖެ އައި ކަމަށް ސްވާމީ އިޝާރަތް ކޮށްފައި އެވަނީ، 3 ނޮވެމްބަރު 1988 ގައި ރާއްޖެ އަށް ދިން އުދުވާނީ ހަމަލާއާ ގުޅިގެން ރާއްޖެއިން އިންޑިއާގެ އެހީ އަށް އެދުމުން އެ ގައުމުގެ ސިފައިން ރާއްޖެ އަށް ފޮނުވި ފޮނުވުމަށެވެ.

އިންޑިޔާގެ ލަކްޝަދީބުގައި އެގައުމުގެ ބޮޑުވަޒީރު ނަންގަވާފައިވާ ފޮޓޯތަކެއް މީސް މީޑިއާގައި އާންމު ކުރުމާއެކު ގުޅިގެން އުފެދުނު ބަހުސްތަކުގައި އިންޑިއާގެ ބޮޑުވަޒީރު ނަރެންދުރަ މޯދީ އަށާއި އެ ގައުމަށް ނިސްބަތްކޮށް ރާއްޖޭގެ ތިން ޑެޕިޔުޓީ މިނިސްޓަރަކު ބަދުބަސް ބުނި މައްސަލައެއް ފެންމަތިވެ ދެގައުމުގެ ދެމެދުގައި ވަނީ ނުތަނަވަސްކަމެއް އުފެދިފައެވެ. 

އަދި މީގެ އިތުރުން ރައީސް މުއިއްޒުގެ ފުރަތަމަ ފުރަމާނަ ދަތުރުފުޅުގައި އިންޑިއާ އަށް ވަޑައިނުގެން ޗައިނާ އަށް ވަނީ ވަޑައިގެންފައެވެ. އަދި އެ ދަތުރަށް ފަހު ރައީސް މުއިއްޒު ވިދާޅުވީ ރާއްޖެ ކިތަންމެ ކުޑަ ނަމަވެސް ރާއްޖެއަށް ބުލީކޮށް ނުހެދޭނެ ކަމަށެވެ. 

އަދި މި ސަރުކާރުން އަންނަނީ އިންޑިއާއަށް ބަރޯސާވުން ކުޑަކުރަން ކާޑުގެ ބާވަތްތައް ތުރުކީން ހޯދުމާ ބޭސް ސީދާ ޔޫރަޕުން ގެނެވޭނެ މަގުފަހިކުރަން މަސައްކަތް ކުރަމުންނެވެ. އަދި މީގެ އިތުރުން އާސަންދައިން ބޭސްފަރުވާ ކުރުމަށް ތައިލޭންޑް ސަރަހައްދުން ވެސް އެ އިންތިޒާމުތައް ހަމަޖެއްސުމަށް ވަނީ ސަރުކާރުން ނިންމާފައެވެ.