ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މަސައްކަތުން ރަމަޟާންމަހަށް ތައްޔާރުވުމުގެ ގޮތުން ހުޅުމާލެ ދެވަނަ ފިޔަވަހީގައި އިތުރު ވަގުތީ މިސްކިތެއް ހެދުމުގެ މަސައްކަތް ފަށައިފިއެވެ.
ރޯދަމަހާއި ދިމާކޮށް ހުޅުމާލޭގައި ހަދާ ވަގުތީ މިސްކިތަކީ 150 މީހުންގެ ޖާގައިގެ މިސްކިތެއްކަމަށާއި، މި މިސްކިތަކީ، ހުޅުމާލެ ދެވަނަ ފިޔަވަހީގައި ދިރިއުޅޭ އާބާދީ އިތުރުވުމާއި ގުޅިގެން، އެ ސަރަޙައްދުގެ ރައްޔިތުންނަށް ދިމާވެދާނެ ދަތިތަކަށް ލުޔެއް ގެނެސްދިނުމަށް ހަދަމުންދާ މިސްކިތެއްކަމަށް އެޗްޑީސީން ބުނެއެވެ.
މި ވަގުތީ މިސްކިތާއި ބެހޭ ގޮތުން އެޗްޑީސީން އިތުރަށް ބުނެފައިވަނީ މިސްކިތް ހަދަނީ ހިޔާ ސަރަޙައްދުގައި ކުޑަކުދިންގެ ޕާކު ހަދާފައިވާ ސަރަޙައްދުގައި އޮތް ހުސްބިމެއްގައި ކަމަށާއި، އަދި ރޯދައިގެ ކުރިން މިސްކިތުގެ މަސައްކަތް ނިންމާލުމަށް ފަހު، ހުޅުވުމަށް މަސައްކަތް ކުރަމުންދާ ކަމަށެވެ.
" ރަމަޟާން މަހަށް ތައްޔާރުވުމުގެ ގޮތުން، ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ލުއިފަސޭހަ ކޮށްދިނުމަށް، ވަގުތީ މިސްކިތެއް ބިނާ ކުރުމުގެ މަސައްކަތް މިކުންފުނިން މިދަނީ ހަލުވިކަމާއިއެކު ކުރަމުންނެވެ. އަންހެނުންނާއި ފިރިހެނުންގެ ބައި ވަކިކޮށް ހަދަމުންދާ މި މިސްކިތުގައި 150 މީހުންގެ ޖާގަ ހިމެނެއެވެ. މިކުންފުނީގެ އަމާޒަކީ ރަމަޟާންމަހުގެ ކުރިން މި ވަގުތީ މިސްކިތް ނިންމުމެވެ."
އެޗްޑީސީގެ އެކްސް ޕޯސްޓުގައި ބުނެފައިވެއެވެ.
ދިވެހިންނަކީ ސައްތައިން ސައްތަ މުސްލިމުންނަށް ވާއިރު ، ކޮންމެ އަހަރެއްގެވެސް ރަމަޟާންމަސް ވެގެންދަނީ މިސްކިތްތަކަށް ވަރަށް ބާރު ބޮޑވެގެންދާ މަހެއްގެ ގޮތުގައެވެ. ވަކިން ޚާއްޞަކޮށް ރަމަޟާން މަހު ރޭއަޅުކަން އަދާ ކުރުމަށްޓަކައި ދެޖިންސްގެ މީހުން މިސްކިތްތަކުގެ ބޭނުން ހިފަމުންދެއެވެ. މިގޮތައް އަލަށް ހެދޭ ވަގުތީ މިސްކިތްތައް ވެސް ހަދާފައި ހުންނަނީ ދެޖިންސް ވަކިން ނަމާދުކުރެވޭ ގޮތަށްކަން ފާހަގަ ކޮށްލަން ޖެހެއެވެ.
މިސަރުކާރުން މިހާރު ނިންމާފައިވާ ގޮތުގައި މިއަންނަ ރަމަޟާން މަހުގެ ފަހު ދިހާގައި ސަރުކާރު ބަންދު ވާނެއެވެ. އެގޮތަށް ނިންމާފައިވަނީ ދިވެހިންނަށް އަޅުކަން ކުރުމުގެ އިތުރު ފުރުޞަތު ތަނަވަސް ކޮށްދިނުމަށް ކަމަށް ވެސް ސަރުކާރުން ހާމަކުރައްވައެވެ.
Advertisement
This content is created and paid for by advertisers and does not involve Voice Journalists
