ރާއްޖޭގެ ފޮރިން މިނިސްޓަރ މޫސާ ޒަމީރާއި އިންޑިއާގެ އެކްސްޓާނަލް އެފެއާޒް މިނިސްޓަރ ސުބްރަމާނިއަމް ޖައިޝަންކަރު މިއަދު ބައްދަލު ކުރައްވައި ދެ ޤައުމުގެ ގުޅުމާއި ގުޅޭގޮތުން މަޝްވަރާ ކުރައްވައިފިއެވެ.
މި ބައްދަލުވުން ކުރިއަށް ގެންގޮސްފައި ވަނީ ޔޫގަންޑާގެ ކަމްޕާލާގައި ކުރިއަށް ދާ ނޮން އެލައިންޑް މޫވްމަންޓް (ނޭމް) ގެ މިނިސްޓަރުންގެ ބައްދަލުވުމުގެ ހަވާސާގެ ތެރެއިންނެވެ.
މި ބައްދަލުވުމާއި ގުޅޭގޮތުން މިނިސްޓަރ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ އިންޑިއާ އާއި ރާއްޖެ އާއި ދެމެދު މިހާރު ކުރިއަށްދާ އިންޑިއާ ސިފައިން ރާއްޖެއިން ބޭލުމާއި ބެހޭ މަތީ ފަންތީގެ މަޝްވަރާތަކާއި ގުޅޭ ވާހަކަތައް އެ ދެ ބޭފުޅުންގެ މިއަދުގެ ބައްދަލު ކުރެއްވުމުގައި ވެސް ދެއްކެވި ކަމަށެވެ.
މިނިސްޓަރ ޒަމީރުގެ ޕޯސްޓުގައި އިތުރަށް ވިދާޅުވެފައި ވަނީ އިންޑިއާއިން ރާއްޖޭގައި ހިންގަމުން އަންނަ މަޝްރޫއުތައް އަވަހަށް ނިންމުމާއި ގުޅޭ ގޮތުންނާއި ނޭމް ސަމިޓާއި ސާކް ސަމިޓާއި ގުޅޭ މަޝްވަރާތައް ވެސް ކުރެއްވި ކަމަށާއި، އަދި ދެ ޤައުމު ގުޅިގެން ކުރާ މަސައްކަތްތައް އިތުރަށް ފުޅާކުރަން ވެސް މަޝްވަރާ ކުރެއްވި ކަމަށެވެ.
މިއަދު މި ދެބޭފުޅުން ބައްދަލުކުރައްވާފައިވާ އިރު ރައީސް ޑރ. މުހައްމަދު މުއިއްޒު ވަނީ ރާއްޖޭގައި ތިބި އިންޑިޔާ ސިފައިން އަންނަ މާރޗު މަހުގެ 15 ގެ ކުރިން ރާއްޖެއިން އަބުރާ ގެންދިއުމަށް އިންޑިއާ ސަރުކާރުގައި ރަސްމީކޮށް އެދި ވަޑައިގެންފައެވެ.
Advertisement
This content is created and paid for by advertisers and does not involve Voice Journalists
