މިހާރުގެ އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ، (އެމްޑީޕީ)އާ، އެޕާޓީގެ ސިޔާސަތުތައް ރަނގަޅު ނޫން ކަމަށް ބުނެ، ޕާޓީން ވަކިވެ، ވަކި ޕާޓީއެއް އުފެއްދި، ޑިމޮކްރެޓްސް، މަޖިލީހުގެ ތެރެއިން އެކުގައި މަސައްކަތް ކުރަން އެއްބަސްވެއްޖެއެވެ. 

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން، ވައްކަންކޮށް، ބޮޑެތި ޚިޔާނާތްތަކުގައި ބައިވެރިވެ، އެމްޑީޕީ ކޮރަޕްޝަންގެ ހާއްޔަކަށް ހަދައި، ޕާޓީގެ އުފެދުނު އަސާސްތައް ބޮލާލާޖަހާފައިވާ ކަމަށްބުނެ، އެޕާޓީން ވަކިވެ، ކުރީގެ ރައީސް މުހައްމަދު ނަޝީދަށް ތާއީދުކުރާ ފަރާތްތަކުން ޑިމޮކްރެޓްސް ގެ ނަމުގައި އައު ޕާޓީއެއް އުފައްދާފައިވާ އިރު، ކުރީ ސަރުކާރު ބަދަލު ވުމާއި ހަމައަށްވެސް ޑިމޮކްރެޓްސް އޮތީ އެމްޑީޕީއާ ދެކޮޅަށެވެ. 

އެހެން ނަމަވެސް، ސަރުކާރު ބަދަލުވެ، ދެ މަސްދުވަސް މިހާތަނަށް ވެފައިވާއިރު، ޑިމޮކްރެޓްސް ގެ މެންބަރުން އެމްޑީޕީއާ އެއްކޮޅަށް ވާހަކަދައްކަވަން ފަށާފައިވާއިރު، މިހަފްތާ ތެރޭގައި ވަނީ އެ ދެޕާޓީގެ އިސްބޭފުޅުން އެކުގައި ބައްދަލުވުމެއް ވެސް ބާއްވައިފައެވެ. 

އެކަމާއި ގުޅޭ ތަފްސީލް ހާމަ ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާރޕާސަން ފައްޔާޒު އިސްމާއީލް ވިދާޅުވީ، ޑިމޮކްރެޓްސް އާއި އެކު މަސައްކަތް ކުރަން ނިންމާފައިވަނީ އަދުގެ ސަރުކާރުން ނުރަނގަޅަށް ގިނަ ކަންތައްތަކެއް ކުރަމުންދާތީ، އެކަމަށްޓަކައި ސަރުކާރު ޖަވާބުދާރީ ކުރުވުމަށް ކަމަށެވެ. 

ޑިމޮކްރެޓްސް އާއި އެމްޑީޕީ އެކުވެގެން މަޖިލިސް ތެރެއިން ކުރާނެ ބައެއް މަސައްކަތް ތަކަށް އަލި އަޅުވާލައްވައި ވާހަކަ ދައްކަވަމުން، ހެންވޭރު ހުޅަނގު ދާއިރާގެ މެންބަރު އަދި ޑިމޮކްރެޓްސް ގެ ރައީސް ހަސަން ލަތީފް ވިދާޅުވީ، ގާނޫނު އަސާސީއަށް މުހިންމު ބަދަލުތަކެއް ގެންނަންޖެހޭ ކަމަށް، އެ ދެޕާޓީއަށްވެސް ފެންނަ ކަމަށެވެ.

އެގޮތުން ހަސަން ލަތީފް ފާހަގަކުރެއްވި ކަންކަމަކީ؛

1) މަޖިލިސް މެންބަރުންގެ އަދަދު މަދުކޮށް، މެންބަރުންގެ އަދަދަކީ "ތަޅު ލެވިފައި އޮތް އަދަދަކަށް ހެދުމަށް" ގާނޫނު އިސްލާހު ކުރުން

2) ސަރުކާރުން ސިޔާސީ މަގާމުތަކަށް އައްޔަންކުރާ މީހުންގެ އަދަދު ވަކި މިންވަރަކަށް ހިފެހެއްޓުމަށް ގާނޫނު އަސާސީ އާއި ގާނޫނަށް ބަދަލު ގެނައުން. 

3) ސަރުކާރު ހިއްސާވާ ކުންފުނިތައް އުފެއްދުމާއި، އެ ރެގިޔުލޭޓް ކުރެވޭނެގޮތް ގާނޫނަކުން ކަނޑައެޅުން

4) އިންތިޚާބުތައް ރަމަޟާން މަހުގައި ނުބޭއްވޭގޮތަށް ގާނޫނު އިސްލާހު ކުރުން

5) ސަރުކާރުން ދަރަނި ނަގާގޮތާއި، ދަރަނި ބޭނުން ކުރާ ގޮތާއި، އަދި އެ ދަރަނީގެ މިންވަރު ހުންނަންޖެހޭނެ ގޮތާއިމެދު މަޝްވަރާކޮށް، ރާއްޖޭގެ އިގްތިސާދު ހިފެހެއްޓޭނެ ގޮތަކަށް ގާނޫނު ބަދަލު ކުރުން.