ދިވެހި ރައްޔިތުން ރައީސުލްޖުމުހޫރިއްޔާ ޑރ މުހައްމަދު މުޢިއްޒު ގެ މި ސަރުކާރު ގެނައި މައިގަނޑު ސަބަބަކީ ކުރީ ސަރުކާރުން ގެންގުޅު ޚާރިޖީ ސިޔާސަތު ކަމުނުދިޔުން ކަމަށް، ފޮނަދޫ ދާއިރާގެ މެންބަރު މޫސާ ސިރާޖު ވިދާޅުވެއްޖެއެވެ. 

އެމްޑީޕީ ދެފަޅިވެގެން އުފެދު ޑިމޮކްރެޓްސް އިން، އެމްޑީޕީއާއި އެކު މަސައްކަތް ތަކެއް ކުރުމަށް ނިންމައި އެކަން އިއުލާން ކުރުމަށް އިއްޔެ ބޭއްވި ނޫސްވެރިންގެ ބައްދަލުވުމުގައި އެ ދެޕާޓީން ވެސް ވަނީ، އެކީގައި މަސައްކަތް ކުރަން ނިންމި އެއް ސަބަބަކީ މިސަރުކާރުން ގެންގުޅޭ ޚާރިޖީ ސިޔާސަތު ކަމުނުދިޔުން ކަމަށް ބުނެފައެވެ. 

އެކަމާއި ގުޅިގެން ސިރާޖު އެކްސްގައި ކުރެއްވި ޕޯސްޓެއްގައި ވިދާޅުވީ ދިވެހިން އެދެނީ ހުރިހާ ގައުމަކާ ރަނގަޅު ގުޅުމެއް ގާއިމުކޮށް، ވަކި ގައުމަކަށް ބަރޯސާނުވެ، ހިންދަމައިލަން ކަމަށެވެ. 

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގެ ޚާރިޖީ ސިޔާސަތު އޮތީ އިންޑިއާއަށް ވަރަށް ބޮޑަށް ބުރަވެފައިވާ ކަމަށް އޭރު އިދިކޮޅުގައި އޮވެގެން މިހާރުގެ ވެރިކަންކުރާ ޕީޕީއެމް/ޕީއެންސީން ވަނީ ބުނެފައެވެ. އެގޮތުން، އެގައުމުން އެކަނި އެތަކެއް ލޯނުތައް ނަގައި، ޕްރޮޖެކްޓް ތައްވެސް އިންޑިޔާގެ އެކި ކުންފުނިތަކަށް ދީފައިވާ ކަމަށް ބުނެ، ވަނީ ފާޑުކިޔާފައެވެ. 

އެއަށްފަހު ރައީސުލްޖުމުހޫރިއްޔާ ޑރ މުޢިއްޒު ވެރިކަމަށް ވަޑައިގެން އެމަނިކުފާނު ވަނީ، އެމަނިކުފާނު ގެންގުޅުއްވާނީ ޕްރޯ މޯލްޑިވްސް ސިޔާސަތެއް ކަމަށް ވިދާޅުވެފައެވެ. އަދި، އިން ފަހަނައަޅައި ނުދާހާ ހިނދަކު ހުރިހާ ގައުމަކާއި ވެސް ގުޅުން ބާއްވަވާނެ ކަމަށް ވަނީ ވިދާޅުވެފަ އެވެ. 

އެއަށްފަހު، ދާދިފަހުން ޗައިނާއަށް ކުރެއްވި ދަތުރުފުޅަށްފަހު ރާއްޖެ ވަޑައިގެން އެމަނިކުފާނު ވަނީ، ހުރިހާ ޚިދުމަތެއް ހޯދަން ވަކި ގައުމަކަށް ބަރޯސާ ވުމުގެ ބަދަލުގައި އެހެން ގައުމުތަކުންވެސް އެހީ ހޯދުމުގެ ސިޔާސަތު ސަރުކާރުން ގެންގުޅޭ ކަން ހާމަކުރައްވާފައެވެ. އެގޮތުން، ކާޑުގެ ބާވަތްތަކާއި، ބޭސްފަރުވާ ފަދަ ޚިދުމަތްތައް ވެސް އިންޑިޔާގެ އިތުރުން އެހެން ގައުމުތަކުން ހަމަޖެއްސުމަށް ނިންމާފައިވާ ކަމަށް އިއުލާން ކުރެއްވިއެވެ. 

އެއާއެކުވެސް އެމްޑީޕީން ވަނީ، މިސަރުކާރުން އިންޑިޔާއާއި ދެކޮޅު ވަނީ ކަމަށް ބުނެ ބޮޑަށް ފާޑުކިޔާފައެވެ.