ރައިސުލްޖުމްހޫރިއްޔާ ޑރ.މުހައްމަދު މުއިއްޒުގެ ކެބިނެޓަށް ރުހުންނުދީ ހިފަހައްޓައިގެން ސަރުކާރު ހުއްޓުވާނުލެވޭކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުالله ޒީވިދާޅުވެއްޖެއެވެ.

މިއަދު ކުރިއަށް ދިޔަ ޕީޕީއެމް ޕީއެންސީގެ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ އެހާ ބޮޑަށް ގައުމަށް ހެޔޮއެދިވަޑައިގަންނަވާ ރައްޔިތުން ދެކެ ލޯބިވާ ބަޔަކު ނަމަ ރައްޔިތުން އިންތިހާބު ކުރައްވާ ރައީސުލްޖުމްހޫރިއްޔާ އަކު ފުރަތަމަ އެކުލަވާލައްވާ ކެބިނެޓަށް ރުހުން ދެއްވާނެ ކަމަށެވެ.

ރައީސް ޑރ.މުއިއްޒު އެކުލަވާލެއްވި ކެބިނެޓަށް ރުހުން ނުދީ ހިފެހެއްޓޭ ކަމަށް ވަންޏާ އެކަން ކުރުމަށް ބޭނުންވާ މެމްބަރުންނާއި ބާރު އިދިކޮޅުގައި އެބައޮތް ކަމަށާއި އެކަމަކު އެކަމުން ސަރުކާރު ހުއްޓުވޭނެކަމަށް ހީފުޅުކުރައްވައިގެން ނުވާނެ ކަމަށެވެ.

Advertisement

އަބްދުއްރަހީމް ވަނީ ކެބިނެޓް އެކުލަވާލުމަކީ ގަނޫނު އަސާސީން ރައީސުލްޖުމްހޫރިއްޔާ އަށް މަތިކުރައްވާފައި އޮތް މަސްއޫލިއްޔަތަކަށް ވާއިރު ވަޒީރުންނަށް ރުހުން ނުދީ އިދިކޮޅުން ޑިމޮކްރަސީގެ ވާހަކަ ދައްކާނީ ކިނެއްތޯ ސުވާލު އުފައްދަވާފައެވެ. މިކަމުންވެސް އިނގެނީ އެބޭފުޅުންގެ ހަމައެއް އުސޫލެއް ނެތްކަމާއި ޑިމޮކްރަސީގެ ކަންފުޅެއްވެސް އެބޭފުޅުންގެ ނެތް ކަން ކަމަށް ވިދާޅުވިއެވެ.

މީގެ އިތުރުންވެސް އެބޭފުޅާ ވިދާޅުވީ ފެހި ގާނޫނު އަސާސީގެ ދަށުން މީގެ ކުރިން އައި ކޮންމެ ސަރުކާރަކަށް ވެސް އޭރު އޮތް އިދިކޮޅުން ރުހުން ދިންކަމަށާއި މިކަން މިކުރަނީ ދިވެހި ރާއްޖޭގެ ތާރީހުގައި އަލަށް ކަމަށެވެ. އަދި އިދިކޮޅު ރުއްސަން ކޮންމެހެން ނޫޅުއްވާ ކަމަށާއި ރުހުން ދިނުމަކީ އެއީ އެބޭފުޅުންނާ ޑީލް ކަޓް ކޮށްގެން ކުރަން ޖެހޭ ކަމެއް ކަމަށް ގަބޫލުފުޅު ނުކުރައްވާކަމަށް ވެސް އަބްދުއްރަހީމް ވިދާޅުވިއެވެ.

 ވަޒީރަކަށް ރުހުން ނުދީގެން ސަރުކާރު ހުއްޓުވާލެވޭނެ ކަމަށް ހީކުރެވޭނަމަ އެއީ ކުށްހީއެއް ކަމަށާއި އެކަމަކީ ވަރަށް ޒިންމާދާރު ކަން ކުޑަ ގޮތެއް ކަމަށް ވިދާޅުވެ އަބްދުއްރަހީމް ވަނީ އިދިކޮޅަށް ފާޑުވިދާޅުވެފައެވެ.