ޕީޕީއެމް/ޕީއެންސީގެ ފަރާތުން 20 ވަނަ ރައްޔިތުންގެ މަޖިލީހަށް ކުރިމަތިލާ ފަރާތްތައް ހޮވުމަށް ބާއްވާ ޕްރައިމަރީގައި ވޯޓު ލެވޭ ފަރާތްތަކުގެ ލިސްޓަށް ބަދަލުގެނައި ކަމަށް ކުރެވޭ ތުހުމަތުތައް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދޮގުކުރައްވައިފިއެވެ.
ރައީސް ޑރ.މުއިއްޒު މިފަދައިން ވިދާޅުވީ މިއަދު ކުރިއަށްދާ ޕީޕީއެމް/ޕީއެންސީގެ ޕްރައިމަރީގެ ވޯޓުލުމުގެ ކަންކަން ހިނގަމުންދާ ގޮތް ބައްލަވައިލެއްވުމަށް ހެންވޭރު ދަނޑަށް ވަޑައިގަތުމަށްފަހު ނޫސްވެރިންނަށް ދެއްވި ބަސްދީގަތުމެއްގައި އެވެ.
ރައީސް ޑރ.މުއިއްޒު ވަނީ އެކަހަލަ ކަމެއް ހިނގައިގެން ނުވާނެ ކަމަށާއި ވޯޓާސް ލިސްޓަށް ބަދަލު ގެނައުމަކީ އެ ކޯލިޝަނުން ގަބޫލުކުރާ ހަމައެއް ނޫންކަމަށް ވިދާޅުވެފައެވެ. އަދި ދެން ވެސް ތުހުމަތެއް ނުވަތަ ޝަކުވާއެއް އޮތްނަމަ ހުށައެޅުމުން ދެފުށް ފެންނަ ގޮތަށް އެކަން ހަމަހަމަކަމާއި އެކު ބަލައިދެއްވާނެ ކަމުގެ ޔަގީން ކަން އެމަނިކުފާނު ވަނީ އަރުވާފައެވެ.
''އަޅުގަނޑެއް ހަމަގައިމުވެސް ގަބޫލެއް ނުކުރަން އެކަހަލަ ކަމެއް ހިނގައިގެންވާނެ ކަމަކަށް. ނުހިނގާނެ. އަޅުގަނޑުމެން ބޭނުންވަނީ ފްރީ އެންޑް ފެއަރ އިލެކްޝަނެއް ބާއްވަން. ދެން ތުހުމަތެއް ޝަކުވާއެއް އޮތިއްޔާ ހުށަހަޅައިގެން ވަރަށް ދެފުށް ފެންނަ ގޮތަށް ހަމަހަމަކޮށް ހުރިހާ ބޭފުޅުންނަށް އަޅުގަނޑުމެން އެކަން ބަލައިދޭނަން.''
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ ވޯޓުލުން ކުރިއަށް ދަނީ ވަރަށް ހަމަޖެހުމާއި އޮމާން ކަމާއި އެކު ކަމަށާއި ދެތިން ދިމާލަކުން ހަމަނުޖެހުން ހިނގިތަން ފެނުނަސް އެކަން މިހާރު ހަމަޖެހިފައިވާ ކަމަށެވެ.
ޖުމްލަ 283 ކެނޑިޑޭޓުން ވާދަކުރާ ޕްރައިމަރީ އަކީ ޕީޕީއެމް/ ޕީއެންސީ ގެ ފަރާތުން ކުރިއަށް އޮތް މަޖިލިސް އިންތިހާބުގައި 73 ދާއިރާއަކުން ކުރިމަތިލާނެ ފަރާތެއް ހޮވުމަށް ބާއްވާ އިންތިހާބެކެވެ. މި އިންތިހާބުގެ ވޯޓުލުން މިއަދު ހެނދުނު 10 ޖެހިއިރު ފެށިގެން ގޮސްފައިވާއިރު، ވޯޓް ލުމުގެ ފުރުސަތު ވަނީ މިއަދު ހަވީރު 5 އާއި ހަމައަށް ހުޅުވާލާފައެވެ.
Advertisement
This content is created and paid for by advertisers and does not involve Voice Journalists
