ގަތަރުގައި މިހާރު ކުރިއަށްދާ އޭޝިއަން ކަޕް ފުޓްބޯޅަ މުބާރާތުގެ ކުއާޓާ ފައިނަލުގެ ދެވަނަ މެޗުގައި 2-1 ގެ ނަތީޖާއަކުން އޮސްޓްރޭލިއާ ބަލިކޮށް ސައުތު ކޮރެއާ އިން މުބާރާތްގެ ސެމީ ފައިނަލުން ޖާގަ ހޯދައިފި އެވެ.

ސައުތު ކޮރެއާ އިން މުބާރާތްގެ ކުއާޓާ ފައިނަލުން ޖާގަ ހޯދީ ދެވަނަ ބުރުގައި ސައުދީ އަރަބިއާ އާއި ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރުވެ ޕެނަލްޓީގައި އެޓީމު ބަލިކުރުމަށްފަހު އެވެ. އަދި އޮސްޓްރޭލިއާ އިން މުބާރާތުގެ ކުއާޓާ ފައިނަލުން ޖާގަ ހޯދީ ދެވަނަ ބުރުގައި ފަސޭހަކަމާއި އެކު 4-0 ގެ ނަތީޖާއަކުން އިންޑޮނޭޝިޔާ ބަލިކުރުމަށްފަހު އެވެ.

މިމެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ކޮރެއާ އިން މެޗު ޑޮމިނޭޓުކުރި ނަމަވެސް މިފާހުގައި އޮސްޓްރޭލިއާގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. ނަމަވެސް މިހާފުގައި އޮސްޓްރޭލިއާ އިން ވަނީ ކައުންޓާ އެޓޭކުތަކުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

Advertisement

އެގޮތުން ފުރަތަަމަ ހާފުގެ 42 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ސައުދީ ޕްރޮފެޝަނަލް ލީގުގެ އަލް ވެހްދާއަށް ކުޅެމުންއަންނަ ތަޖުރިބާކާރު ފޯވާޑް ކްރެއިގް ގުޑްވިން އެވެ. މިއީ އެޓީމުގެ ޑިފެންޑަރު ނެތަނިއަލް އެޓްކިންސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އޮސްޓްރޭލިއާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން ކުޅެ މެޗު ޑޮމިނޭޓުކުރީ ކޮރެއާ އިންނެވެ. އަދި މިހާފުގައި ވެސް ކައުންޓާ އެޓޭކުތަކުގައި އޮސްޓްރޭލިއާގެ ފަރާތުން ރަނގަޅު އެޓޭކުތަކެއް ފެނިގެންދިޔުމުގެ އިތުރުން މެޗުގެ އިތުރު ވަގުތާއި ހަމައަށް އެޓީމުން ވަނީ ކޮރެއާގެ އެޓޭކުތައް ހުއްޓުވުމުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކަދީފައެވެ.

ކޮރެއާއިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ފޯވާޑް ހީ ޗަން ހުއާންގް އެވެ. މިލަނޑާއެކު މެޗުގެ 90 މިނެޓްގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިއާއެކު ނަތީޖާ ނެރުމަށްޓަކައި އިތުރަށް 15 މިނެޓްގެ ދެ ހާފް ކުޅެވުނު އިރު، ކޮރެއާ އިން މެޗުގެ ލީޑު ހޯދީ އިތުރު ވަގުތުގެ ފުރަތަމަ ހާފު ނިމެން އުޅެނިކޮށެވެ. މިލަނޑު އެޓީމަށް ކާމިޔާބުކޮށްދިނީ ޓޮޓެންހަމްގެ ފޯވާޑް ހިއުންގް މިން ސޮން އެވެ. މިއީ އޮސްޓްރޭލިއާގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން މިއީ މި މުބާރާތުގައި ސޮން ކާމިޔާބުކުރި ތިންވަނަ ލަނޑެވެ. އަދި އިތުރު ވަގުތުގެ ފުރަތަމަ ހާފުގެ އެންމެ ފަހު މިނެޓްގައި އޮސްޓްރޭލިއާގެ މިޑްފީލްޑަރު އެޑެން އޯނީލް އަށް ސީދާ ރަތް ކާޑެއް ދައްކާ ދަނޑުން ފޮނުވާލާފައިވާ އިރު، މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ. 

އިތުރު ވަގުތުގެ ދެވަނަ ހާފުގައިި ސައުތު ކޮރެއާ އިން ގިނަ ފުރުސަތުތަކެއް ތަނަވަސްކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ސައުތު ކޮރެއާ ކުރީގައި އޮވެގެންނެވެ.

މުބާރަތުގެ ސެމީ ފައިނަލުގައި މިމަހުގެ 6 ވަނަ ދުވަހުގެ ރޭ ސައުތު ކޮރެއާ އިން ނުކުންނާނީ ޖޯޑަން އާއި ދެކޮޅަށެވެ.