ރައްޔިތުން މަޖިލިހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް މިއަދު ބޭއްވުނު އެމްޑީޕީގެ ޕްރައިމަރީން ކަޓައިފިއެވެ.

އެމްޑީޕީގެ އަންހެނުންގެ ރޫހުގެ ރައީސާ ކުރެއްވުމުގެ އިތުރުން އެމްޑީޕީގެ ލީޑަރޝިޕްގެ ބޭއްފުޅުންނާއި ވަރަށް ގާތްގުޅުމެއް ބާއްވަވަމުން ގެންދަވާ ރޮޒެއިނާ މިއަދު އޮތް އެމްޑީޕީ ޕަރައިމަރީގައި  ކުރިމަތިލެއްވީ ފޭދޫ އުތުރު ދާއިރާ އަށެވެ.

މިއަދު ބޭއްވުނު ޕްރައިމަރީގައި އެ ދާއިރާގެ އެމްޑީޕީގެ ޓިކެޓް ކާމިޔާބު ކުރެއްވީ ރާއްޖޭގެ ފުޓްބޯޅައިގައި މަޝްހޫރު ފަރާތެއް ކަމަށްވާ  އަހުމަދު ޝަރީފު (ޑުންގާ) އެވެ. 
އޭނާއަކީ ގިނަ އަހަރުތަކެއް ވަންދެން ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގައި މަސައްކަތް ކުރެއްވުމުގެ އިތުރުން ކުޑަކުދިންނަށް ފުޓްބޯޅައިގެ ތަމްރީނުދީ ރާއްޖޭގެ އެކިއެކި ސަރަހައްދުތަކުގައި ފުޓްބޯޅަ ކޯޗެއްގެ ގޮތުގައި ހަރަކާތްތެރިވެފައިވާ ފަރާތެކެވެ.

Advertisement

ރޮޒއިނާ ވާދަކުރެއްވި ދާއިރާގެ ވަގުތީ ނަތީޖާއަށް ބަލާއިރު އަހުމަދު ޝަރީފު (ޑުންގާ) އަށް 257 ވޯޓް ލިބުނު އިރު ރޮޒެއިނާއަށް ލިބިފައިވަނީ 221 ވޯޓެވެ. ދެން އެ ދާއިރާއަށް ވާދަކޮށްފައިވަނީ މަޖިލސްގެ ކުރީގެ މެމްބަރެއް ކަމަށްވާ އަހުމަދު ހަމްޒާއެވެ. އޭނާއަށް ލިބުނީ  206 ވޯޓެވެ.

ރޮޒއިނާ އެންމެ ފުރަތަމަ މަޖިލަހަށް އިންތިހާބުވެ ވަޑައިގެންފައިވަނީ ރައީސް މައުމޫނުގެ ވެރިކަމުގައި ޑީއާރުޕީގެ ޓިކެޓްގައި ކ.ތުލުސްދޫ ދާއިރާއަށެވެ. އެއަށްފަހު ޑީއާރުޕީ ދޫކުރައްވާ އެމްޑީޕީއަށް ބަދަލުވެ އެޕާރޓީގެ ޓިކެޓްގައި އައްޑޫ މީދޫ ދާއިރާގެ މެމްބަރު ކަމަށް ހޮވިވަޑައިގަތީ 2014 ގައެވެ. އަދި 2019 ވަނަ އިންތިހާބުގައި ވަނީ އެގޮޑި ދިފާއު ކުރައްވާފައެވެ.

މިފަހަކަށް އައިސް ރޮޒެއިނާ ބޮޑަށް ފާހަގަކުރެވިގެން ގޮސްފައިވަނީ މިހާރުގެ ސަރުކާރަށް އަދި އެމްޑީޕީ ވެރިކަމުގައި އޮތްއިރު އިދިކޮޅު ފަރާތްތަކަށް އެންމެ ބޮޑަށް ފާޑު ވިދާޅުވަމުން ގެންދެވި މަޖިލިސް މެމްބަރުގެ ގޮތުގައެވެ.

މިއަދު ބޭއްވުނު ޕްރައިމަރީން ރޮޒައިނާއަށް ނާކާމިޔާބީ އާއި ކުރިމަތިވެ ވަޑައިގެންނެވި އިރު ނިމިދިޔަ ސަރުކާރުން ދޫކުރި ގޯތި ލިބުނު ފަރާތްތަކުގެ ތެރޭގައި ރޮޒެއިނާ އާއި އޭނާގެ ފިރިކަލުން ހިމެނިފައި ވުމުން ގިނަބައެއްގެ ފާޑިކިޔުން އަމާޒުވެގެން ގޮސްފައިވެއެވެ.