މިސަރުކާރުގެ އިގްތިސާދީ ސިޔާސަތުތައް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބަލައިގެންފައިވާ ކަމަށާ، އޭގެ ސަބަބުން އިންވެސްޓަރުންގެ އިތުބާރު ރާއްޖެއަށް ލިބިގެންދާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
މި އަހަރުގެ ޖެނުއަރީ ތިނަކުން ފެބްރުއަރީ ހަޔަކަށް ރާއްޖެ ޒިޔާރަތްކުރެއްވި އައިއެމްއެފްގެ ޚާއްޞަ ވަފުދަކުން ވަނީ ރާއްޖޭގެ އެކި ދާއިރާތަކަށް ބައްދަލު ކުރުމަށްފަހު އިކޮނޮމިކް ޑިވްލޮޕްމަންޓް އައުޓްލުކް އެއް ނެރެފައެވެ.
އައިއެމްއެފް ގެ އިކޮނޮމިކް ޑިވްލޮޕްމަންޓް އައުޓްލުކް ގައި ރައީސް ޑރ. މުޢިއްޒުގެ ސަރުކާރުގެ އިޤްތިޞާދީ އެޖެންޑާއަށް މަރުޙަބާ ކިޔާފައިވެއެވެ. އެންމެ މުހިންމު އެއް ކަމެއްގެ ގޮތުގައި ރިޕޯޓުގައި ފާހަގަކޮށްފައިވަނީ ރާއްޖޭގެ އިޤްތިޞާދު މިހާރު ވެއްޓިފައިވާ ވަޅުގަނޑަކަށް ވެއްޓުމުގެ އަސްލު ކަމަށްވާ ފައިސާ ޗާޕު ކުރުން ހުއްޓާލަން ނިންމާފައިވާ ނިންމުމެވެ.
އަދި ހަމައެހެންމެ އައިއެމްއެފްގެ ރިޕޯޓުގައި ދިވެހި ރާއްޖޭގެ ފަތުރުވެރިކަން ކުރިއަރާނެ ކަމަށް ލަފާކޮށްފައިވާއިރު ރައީސް މުޢިއްޒު އިޢުލާނުކުރެއްވި ވެލާނާ އެއާޕޯޓް މަޝްރޫޢުއާއިއެކު އެއާޕޯޓު ތަރައްޤީވެގެން ދިޔުމުން ހެޔޮ ބަދަލެއް އަންނާނެ ކަމަށް އެ ރިޕޯޓުގައި ލަފާކޮށްފައިވެއެވެ.
މިއަދު ތ އޮމަދޫ ގައި ބޭއްވި ޖަލްސާގައި އެ ރިޕޯޓަށް އަލި އަޅުވާލައްވައި ވާހަކަ ދައްކަވަމުން ރައީސް މުޢިއްޒު ވިދާޅުވީ، އައިއެމްއެފް އިން އެފަދައިން، ރާއްޖޭގެ މިސަރުކާރުގެ އިގްތިސާދީ ސިޔާސަތުތައް ބަލައިގަތްކަން ހާމަ ކޮށް، ބަޔާން ނެރުމުން، ރާއްޖެއަށް އިންވެސްޓަރުންގެ އިތުބާރު ލިބިގެންދާނެ ކަމަށެވެ.
އަޅުގަނޑުމެންގެ ސަރުކާރުން ކަނޑައަޅާފައި ހުރި އިގްތިސާދީ ސިޔާސަތު ބަލައިގެންފައި އައިއެމްއެފް އިން ސްޓޭޓްމަންޓް ނެރެފައި އެބައޮތް. އެއީޔޭ ކަންކަން ކުރަންވީ ގޮތަކީ. ޕީއެސް އައިޕީ މަޝްރޫޢުތައްވެސް ތަރުތީބު ކޮށްލައިގެން، ދެން ހުރި އެކި ކަހަލަ ސަބްސިޑީ ތަކާއި، ކަންކަންވެސް ވަކި އުސޫލަކުން، ހަމަ އަކަށް ފައްތައިގެން، ޚަރަދު ހަމަޖައްސައިގެން އާމްދަނީ އިތުރު ކުރުމަށްޓަކައި އިގްތިސާދީ ކަންކަން ފުޅާކުރަން އަޅުގަނޑުމެން ފަށާފައި މިހިރަ ކަންކަން، އެކަންކަން އައިއެމްއެފް އިން އެއޮތީ ބަލައިގަނެފަްޖ. އައިއެމްއެފް ކަހަލަ ތަންތަނުން، އަޅުގަނޑުމެންގެ ސިޔާސަތު ބަލައިގަތީމާ، އެ ބުނެވެނީ ވަރަށް ބޮޑު އެއްޗެއް. އޭގެ މައްޗަށް ބިނާވާނީ އިންވެސްޓަރ ކޮންފިޑެންސް އިތުރުވުން.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
އިންވެސްޓަރުންގެ އިތުބާރު ލިބިއްޖެ ނަމަ، ރާއްޖެއަށް އިންވެސްޓް ކުރުމަށް އިންވެސްޓަރުން އަންނާނެކަމަށާ، އިންވެސްޓަރުން އިތުރު ވުމުން، ރާއްޖޭގެ އާމްދަނީ އިތުރުވެ، ރައްޔިތުން ބޭނުންވާ ކަންކަން ކުރުމަށް ސަރުކާރަށް ފަސޭހަ ވެގެންދާނެ ކަމަށް ރައީސް މުޢިއްޒު ފާހަގަކުރެއްވި އެވެ. އަދި އޭގެ ސަބަބުން އަމިއްލަ ވިޔަފާރިތައް ވެސް މުއްސަނދި ވެގެންދާނެ ކަމަށް ރައީސް މުޢިއްޒު ވިދާޅުވި އެވެ.
ރައީސް މުޢިއްޒު އިތުރަށް ވިދާޅުވީ، ރާއްޖޭގެ ރަށްތަކަށް ކަންކަން ކޮށްދެއްވުމުގައި ކުޑަ ރަށެއް ބޮޑު ރަށެއް ތަފާތު ނުކުރައްވާނެ ކަމަށެވެ.
މިއާއެކު ރައީސް މުޢިއްޒު ވިދާޅުވީ، އެމަނިކުފާނުގެ މިސަރުކާރުގެ ސިޔާސަތު ބައްޓަންކޮށްފައިވާނީ ފަރުދީ އަދި އާއިލީ މުއްސަނދި ކަމުގެ މައްޗަށް ބިނާ ކޮށް ކަމަށެވެ. އަދި އެ މުއްސަނދި ކަން ރާއްޖޭގެ ހުރިހާ އާއިލާ އަކަށްވެސް ފޯރާނެ ކަމުގެ ޔަގީންކަން ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
