ހުޅުމާލެ ފަރުކޮޅުފުށީގައި ޕެޓް ކެއާ ފެސިލިޓީއެއް ނުވަތަ ޖަނަވާރުންނަށް ހޭހަންކުރާ ތަނެއް ގާއިމު ކުރަން ބޭނުންވާ ބިން މާލެ ސިޓީ ކައުންސިލާއި ހަވާލުކޮށްފިއެވެ.
މާލޭގައި ބުޅާ ގިނަވެ އޭގެ އުނދަގޫ އާއްމުންނަށް އިންތިހާއަށް ބޮޑޮވެފައިވައިރު، ހުޅުމާލޭގައި ވަގުތީ ކެޓް ޝެލްޓަރއެއް ހަދަން ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން މާލެ ސިޓީ ކައުންސިލާއި ހަވާލު ކުރީ މިދިޔަ ޖަނަވަރީ މަހުގެ 25 ވަނަ ދުވަހުއެވެ.
އެގޮތުން ފަރުކޮޅުފުށީގައި މިކަމަށް 5000 އަކަ ފޫޓުގެ ބިމެއް ހަމަޖައްސާ ބިން ދޫކުރުމުގެ އެއްބަސްވުމުގައި ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީއާއި މާލެ ސިޓީ ކައުންސިލާ ދެމެދުވަނީ އެއްބަސްވުމެއްގައި ސޮއިކޮށްފައެވެ. މިއީ އޮޅުކޮށްގެން ގެންގުޅޭ ޖަނަވާރުތަކަށް ރައްކާތެރި މާޙައުލެއް ފޯރުކޮށްދިނުމަށް ހަދާ ތަނެކެވެ.
މާލެ ސަރަހައްދުގައި އުޅޭ ބުޅާތައް އެ ތަނަށް ބަދަލުކޮށް، ފަރުވާ ދެވޭނެ އިންތިޒާމު ވެސް ހުންނާނެއެވެ.
މި ޝެލްޓާ އެޅުމަށް ބޭނުންވާ ބިން މިހާރު ހަވާލުކޮށްފައިވާ ކަން މާލެ ސިޓީ ކައުންސިލުން ވަނީ މިއަދު ހާމަކޮށްފައެވެ.
މާލޭގެ މަގުތަކުގައި ބުޅާތައް ގިނަވުމަކީ މާލޭގެ ރައްޔިތުން ކަންބޮޑުވާ ކަމެކެވެ. މިކަމަށް ހައްލު ހޯދުމަށް ޕެޓް ކެއާ ފެސިލިޓީއެއް އް ޤާއިމްކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހަފްތާ 14 މަގުޗާޓުގައިވަނީ ހިމަނާފައެވެ.
މި މަސައްކަތް ކުރިޔަށް ދާނީ ސިޓީ ކައުންސިލްގެ ބެލުމުގެ ދަށުންނެވެ.
Advertisement
This content is created and paid for by advertisers and does not involve Voice Journalists
