އިންޑިއާގެ އަސްކަރިއްޔާއަށް ނިސްބަތްވާ ސިފައިންތަކެއް އެރި ދިވެހި މަސް ދޯނިތައް ހަރަކާތްތެރި ވެފައިވާ ސަރަހައްދުތައް ބެލި ބެލުމުން، މިދިޔަ އެއް މަސް ދުވަހުގެ ތެރޭގައި ވެސް ރާއްޖޭގެ އިގްތިސާދީ ސަރަހައްދުން އެ ދޯނިތައް ބޭރުވެފައި ނުވާކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ޝިޔާމް މިފަދައިން ވިދާޅުވީ މިދިޔަ މަހު ދިވެހި ތިން މަސްދޯންޏަކަަށް އަރާފައިވަނީ ކޮން ގައުމެއްގެ ސިފައިންތޯ ކަށަވަރު ކުރެވިފައިވޭތޯ އާއި، އެފަދަ ކަމެއް ދެވަނަ ފަހަރަށް ތަކުރާރު ވިޔަ ނުދިނުމަށް އަޅާފައިވާ ފިޔަވަޅު ތަކަކީ ކޮބައިތޯ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ކުރި ސުވާލަށް ޖަވާބު ދެއްވަމުންނެވެ.
އެސުވާލަށް ޖަވާބު ދެއްވަމުން ޝިޔާމް ވިދާޅުވީ، ދިވެހި މަސްދޯނިތަކަށް ބޭރުގެ ސިފައިން އަރާފައި ވަނީ ދިވެހިރާއްޖޭގެ ކަނޑުގެ ސަރަހައްދުތައް ހަރަކާތްތެރިވަމުން ދަނިކޮށް ކަމަށެވެ.
އަދި ނިމިދިޔަ މަސް ދުވަހު އެ ދޯނިތައް ހަރަކާތްތެރި ވެފައިވާ ސަރަހައްދުތައް ބެލި ބެލުމުން، އެއިން އެއްވެސް ދުވަހަކު، އެ ދޯނިތައް ރާއްޖޭގެ އިގްތިސާދީ ކަނޑުގެ ސަރަހައްދުން ބޭރުވެފައި ނުވާކަން ޝިޔާމް ފާހަގަކުރެއްވި އެވެ.
އެނގިވަޑައިގަންނަވާނެ، ދިވެހިރާއްޖޭގެ އިގްތިސޯދީ ސަރަހައްދުގައި ތިން ދޯނި ވެސް ހަރަކާތްތެރިވަމުންދިޔަ ވަގުތެއްގައި. އަދި އަޅުގަނޑުމެން ވީއެލްޑީ ނޫނިއްޔާމު ވެސެލް މޮނީޓަރިން ސިސްޓަމުން ބަލާއިރުގަ އަޅުގަނޑުމެން ފާއިތުވި އެއް މަސް ދުވަހުގެ މޫވްމަންޓު އަޅުގަނޑުމެން ބެލިއިރުގަ މި ދޯނިތަކުގެ މޫވަމަންޓު މިހުރީ ސީދާ ރާއްޖޭގެ އިގްތިސާދީ ސަރަހައްދުތަކުގެ ތެރޭގައި.
ވަޒީރު އަހުމަދު ޝިޔާމް
މިއާއެކު ޝިޔާމް ވިދާޅުވީ ދޯނިތަކަށް އެރީ އިންޑިއާގެ ކޯސްޓްގާޑުގެ ސިފައިންކަމަށާއި، އެ ސިފައިންގެ ފަރާތުން ދިމާވި ކަންކަމުގެ ސަބަބުން ފަޅުވެރިންނަށް ނަފްސާނީ ގޮތުން އުނދަގޫތައް ދިމާވި ކަމަށެވެ.
ތި ވިދާޅުވިހެން އިންޑިއާގެ ސިފައިންތަކެއް މި ތިން ބޯޓަށް ވެސް އޮންބޯޑުވެގެން ކަންކަން ހިންގީ.. އޭގެ ތެރެއިން އެއް ދޯނިން ކެޔޮޅާއި އަދި ފަޅުވެރިންނާ ވެސް އަޅުގަނޑުމެން ބައްދަލު ކުރިން. ތި ވިދާޅުވިހެން ނަފްސާނީ އުނދަގޫކަމެއްގެ ތެރޭގައި ތިބީ. އެމްއެންޑީއެފުން ވަގުތުން އެޓެންޑު ކުރި މިކަމަށް.
ވަޒީރު އަހުމަދު ޝިޔާމް
މީގެ އިތުރުން ޝިޔާމް ވިދާޅުވީ އެ ހާދިސާ ހިނގުމާއި އެކު އެމްއެންޑީއެފް އާއި މިނިސްޓްރީ ވެސް ގުޅިގެން މައްސަލަ ބަލައި، މަސްދޯނިތަކުގެ ޚަބަރު ބަލަން ފެށި ކަމަށެވެ. އަދި އެފަދަ ހާދިސާތައް މުސްތަގުބަލްގައި ތަކުރާރުވިޔަ ނުދިނުމަށް އެމްއެންޑީއެފްގެ ކޯސްޓްގާޑް ވަރުގަދަ ކޮށް، ހަރަކާތްތެރި ވަމުންދާނެ ކަމުގެ ޔަގީންކަން އެ އިދާރާއިން ދީފައިވާ ކަމަށް ޝިޔާމް ވިދާޅުވި އެވެ.
މިދިޔަ ޖަނަވަރީ މަހުގެ 31 ވަނަ ދުވަހުގެ ހަވީރު ރާއްޖޭގެ ކަނޑުގެ ސަރަހައްދުގައި އޮތް ދޯނިތަކަކަށް ބޭރުގެ ސިފައިން އެރި މައްސަލައެއް ވަނީ ފެންމަތި ވެފައެވެ. އެ ސިފައިން ހަތީޔާރާއި އެކު އެ ދޯނިތަކަށް އަރައި، މަސްވެރިންނާއި ސުވާލުވެސް ކޮށްފައި ވާއިރު، އެކަމަކީ ބައިނަލްއަގްވާމީ ކަނޑުގެ ގާނޫނު ތަކާއި ޚިލާފަށް އިންޑިޔާއިން ކުރި ކަމެއް ކަަމަށް ސަރުކާރުން ވަނީ ބުނެފައެވެ.
އަދި އެކަން ހިނގައިދިޔަ ގޮތް ތަފްސީލް ކޮށްދިނުމަށް ވެސް ސަރުކާރުން އެދިފައި ވާއިރު, މިހާތަނަށް އިންޑިޔާއިން ޖަވާބު ދިން ކަމެއް ނުވަތަ ނުދޭ ކަމެއް ސަރުކާރުން ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
