ދިވެހިރާއްޖޭގައި އަދިވެސް، ވެރިކަންކުރާ ޕީއެންސީއަށްވުރެ، ޕީޕީއެމަށް އިޚްލާޞްތެރި މެންބަރުން ގިނަ ކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ. 

ޕީއެންއެފުން ރޭ ބޭއްވި ޖަލްސާގައި ވާހަކަ ދައްކަވަމުން އެޕާޓީގެ ގިނަ ފަރާތްތަކުން ވަނީ ޕީޕީއެމާއި ޕީއެންސީގެ މެންބަރުންގެ އަދަދާއި، އެ މެންބަރުންގެ ފިކުރާއި ގުޅޭގޮތުން ގިނަ ވާހަކަތަކެއް ދައްކާފައެވެ.

އެވާހަކަ ތަކާއި ގުޅޭގޮތުން ވާހަކަދައްކަވަމުން ރައީސް ޔާމީން ވިދާޅުވީ ރާއްޖޭގައި އަދިވެސް ގިނައީ ޕީއެންސީއަށްވުރެ ޕީޕީއެމަށް އިޚްލާޞްތެރި މެންބަރުން ކަމަށެވެ. އެހެންނަމަވެސް، ޕީޕީއެމްގެ ޓިކެޓްގައި މަޖިލީހަށް އެންމެ މެންބަރަކުވެސް ވާދަނުކުރައްވާ ކަމަށް އެމާނިކުފާނު ވިދާޅުވި އެވެ. 

Advertisement

ރައީސް ޔާމީން އިތުރަށް ވިދާޅުވީ، ޕީޕީއެމް މެންބަރުން ޕީއެންސީއަށް ނުގެންދަވާމެ ކަމަށް ކުރިން ޕީއެންސީގެ އިސް ބޭފުޅުން ވިދާޅުވި ނަމަވެސް، ފެނިގެންދިޔައީ ބައެއް ކައުންސިލް ތަކުގެ ހުރިހާ ބޭފުޅުން ޕީޕީއެމުން ޕީއެންސީއަށް ބަދަލު ކުރުވާ ތަން ކަމަށެވެ. 

މީގެ އިތުރުން ރައީސް ޔާމީން ވަނީ، 90 އަށްވުރެ ގިނަ ދާއިރާއަށް މަޖިލީހަށް ވާދަކުރަން ފުރުސަތު ހުޅުވާލުމުން އެތަނުން އެއް ދާއިރާ އަކަށްވެސް ޕީޕީއެމްގެ އެންމެ ކެންޑިޑޭޓެއްވެސް ވާދަ ނުކުރެއްވުމުގެ ޒިންމާ ނަންގަވަން ޖެހިވަޑައިގަންނަވާނީ ކޮން ބައެއްތޯ ސުވާލު ކުރައްވާފައެވެ. 

އަދި ޕީޕީއެމްގެ އެންމެ އިސްކޮށް މަސައްކަތް ކުރައްވަމުންދިޔަ ދެ ލީޑަރުން މިހާރު އެ ތިއްބެވީ ސަރުކާރުގެ އިސް މަގާމުތަކުގައި ކަމަށާއި މިހާރުވެސް ޕީއެންސީއަށްވުރެ ޕީޕީއެމްގެ މެމްބަރުން ގިނަވެފައި އިހްލާސްތެރިވާނެ ކަމަށެވެ.

ޔާމީން އެ ވިދާޅުވި ޕީޕީއެމްގެ ދެ ލީޑަރުންނަކީ ޕީޕީއެމްގެ ދެ ނައިބު ރައީސުން ކަމަށްވާ ފިޝަރީޒް މިނިސްޓަރު އަހުމަދު ޝިޔާމް އާއި ޑިފެންސް މިނިސްޓަރު ޣައްސާން މައުމޫންގެ ވާހަކަފުޅެވެ.