ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވަޢުދުވެ ވަޑައިގެންފައިވާ ފަދައިން ހިޔާ ފުލެޓްތަކުގައި ލިފްޓް ހަރުކުރުމުގެ މަސައްކަތް ފަށައިފިއެވެ.

މި މަސައްކަތް ހަވާލުކޮށްފައި ވަނީ މިކަމުގެ ތަޖުރިބާ ހުރި ޗައިނާގެ ކުންފުންޏެއް ކަމަށްވާ ޝެންޔަންގް ޔުއާންޑް އިންޓެލެކްޗުއަލް ގުރޫޕާއެވެ.

ހައުސިންގ ޑެވެލޮޕްމަންޓް ކޯޕަރޭޝަން، އެޗްޑީސީގެ ފަރާތުން މަޢުލޫމާތު ދެއްވި ގޮތުގައި މި އެއްބަސްވުމުގެ ދަށުން ހިޔާ ފްލެޓްތަކުގައި މުޅި ޖުމްލަކޮށް 32 އާ ލިފްޓް ބެހެއްޓިގެންދާނެއެވެ.

Advertisement

އެއީ ކޮންމެ ފްލެޓަކަށް އިތުރު ޕެސެންޖަރ އަދި ސްޓްރެޗަރ ލިފްޓެކެވެ. އެގޮތުން ޕެސެންޖަރ ލިފްޓުގައި 14 މީހުންގެ ޖާގަ އޮންނާނެއެވެ.

އެޗްޑީސީން އިތުރަށް ވިދާޅުވި ގޮތުގައި މި މަޝްރޫއު އަކީ ހިޔާ ފްލެޓްތަކުގައި ދިރިއުޅެމުންދާ ފަރާތްތަކަށް ލިފްލެޓްގެ ދަތިކަން ދިމާވާތީ އެކަމަށް ހައްލެއް ގެނައުމަށް ކުރިއަށް ގެންދެވޭ މަޝްރޫއެކެވެ. އަދި މި ލިފްޓުތައް ގާއިމްކުރުމުން ލިފްޓަށް އެރުމަށް އޮންނަ ކިއޫ ކުޑަވެ، ލިފްޓް ގެ އިންތިޒާރުގައި ހޭދަކުރަންޖެހޭ ވަގުތު ކުޑަވެގެންދާނެއެވެ.

އެޗްޑީސީން އަބަދުވެސް މަސައްކަތް ކުރަމުން ދަނީ ރައްޔިތުންނަށް ވީހާވެސް ފަސޭހަ ވާނެހެން ކަންތައް ކޮށްދިނުމަށް ކަމަށް އެ ކޯޕަރޭޝަނުން ވިދާޅުވެއެވެ.

މި މަޝްރޫއުގެ މަސައްކަތް މިހާރު ފެށިފައި ވާއިރު، މި މަސައްކަތް އެއް އަހަރު ދުވަސް ތެރޭ ނިމޭނެކަމަށް ވެސް އެޗްޑީސީން މައުލޫމާތު ދެއްވައެވެ.

ހިޔާފުލެޓްގައި އިތުރު ލިފްޓް ހަރުކޮށްދިނުމަކީ ރައީސުލްޖުމުހުރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދަކަށް ވާއިރު ވެރިކަމަށް ވަޑައިގެންވެސް އެމަނިކުފާނު ވަނީ ތަކުރާރުކޮށް ހިޔާ ފުލެޓްގައި ލިފްޓް ހަރުކޮށްދެއްވާނެކަމަށް ވިދާޅުވެފައެވެ.

މިހާރު ހިޔާފުލެޓްތަކުގައި ހަރުކުރެވިފައިވާ ލިފްޓްމަދުކަމުން ބައެއް ގަޑިތަކުގައި ދިގު، ކިއުތައް ހެދިފައި އޮންނަ މަންޒަރު ފެނިގެންދެއެވެ.