ގުރުއާނާ ބެހޭ ގައުމީ މަރުކަޒުގެ ގޮތްޕެއް ހުޅުމާލޭގައި  ޤާއިމުކުރުމަށްޓަކައި  ކޮމާޝަލް ޔުނިޓެއް ދިނުމަށް މިއަދު އެއްބަސްވުމެއްގައި ސޮއިކޮށްފިއެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވިދާޅުވީ، ގުރުއާނާ ބެހޭ މަރުކަޒުގެ ހިދުމަތް އިތުރަށް ފުޅާކުރުމަށް، އެ މަރުކަޒަށް ކޮމާޝަލް ޔުނިޓެއް ހަވާލުކޮށްފައި ވަނީ އެ ކޯޕަރޭޝަންގެ ސީއެސްއާރުގެ ދަށުން، ކުލި ނުނަގާ ގޮތަށް ކަމަށެވެ.

މިއަދު ސޮއިކުރެވުނު  އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދާއި ޗީފް ފައިނޭންޝިއަލް އޮފިސަރ އަހްމަދު ޝާމެވެ. އަދި ގުރުއާނާއި ބެހޭ މަރުކަޒުގެ ފަރާތުން ސޮއިކުރައްވާފައި ވަނީ އިމާމް އަބްދުލް ޖަލީލް އިސްމާއިލް އަދި އިމާމް އަބްދުﷲ ރަޝީދެވެ.

Advertisement

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިތުރަށް ވިދާޅުވި ގޮތުގައި ގުރުއާނާއި ބެހޭ މަރުކަޒުގެ ހުޅުމާލޭގެ ގޮތްޕަށް މިއަދު ދޫކުރި ކޮމާޝަލް ޔުނިޓް އެ މަރުކަޒާއި ހަވާލުކޮށްފައިވަނީ އެއްވެސް ފީއެއް ނުނަގާ ގޮތަށް ފަސް އަހަރު ދުވަހުގެ މުއްދަތަކަށެވެ.

އެޗްޑީސީން އިތުރަށް ވިދާޅުވެފައިވާ ގޮތުގައި މި އެއްބަސްވުމުގެ ދަށުން ހުޅުމާލޭގައި ގާއިމްކުރެވޭ ގުރުއާނާ ބެހޭ މަރުކަޒުގެ ގޮފިން ގިނަ ހިދުމަތްތަކެއް ފޯރުކޮށްދެވޭނެއެވެ.  އޭގެ ސަބަބުން ޤުރުއާނާއި ބެހޭ މަރުކަޒުން ޚިދުމަތްތައް ހޯދާ ފަރާތްތަކަށް ގިނަ ގުނަ ފަސޭހަތަކެއް ލިބިގެން ދާނެއެވެ.

މި ސަރުކާރު ވެރިކަމާއި ހަވާލުވުމަށް ފަހު ހުޅުމާލެއިން ފަސޭހައިން ގިނަ ޚިދުމަތްތަކެއް ލިބޭނެގޮތަށް ކަންތައްތަކެއް ކުރަމުން ގެންދާކަން ފާހަގަކޮށްލެވެއެވެ . އެގޮތުން ދާދިފަހަކުން ވަނީ އެމްއައިބީގެ ޑޮލަރު އޭޓީއެމެއްވެސް ހުޅުމާލޭގައި ބަހައްޓާ ޚިދުމަތްދޭން ފަށާފައެވެ.