މުދާ އަރުވައި ބޭލުމުގެ ދަތިކަން ހައްލުކުރުމަށް ހުޅުމާލެ ދެވަނަ ފިޔަވަހީގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަރާތުން ވަގުތީ ޖެޓީއެއް ހަދާ މިއަދު އެތަނުން ޚިދުމަތްދޭން ފަށައިފިއެވެ.
މިކަން ހާމަކޮށްފައިވަނީ އެޗްޑީސީއިން ކުރި އިއުލާނެއްގައެވެ. އެޗްޑީސީގެ އެ އިއުލާނުގައި ބުނެފައިވަނީ ހުޅުމާލެއަށް މުދާ އަރުވައި ބޭލުމުގެ ދަތިކަން ހުޅުމާލޭގެ ތަރައްގީގެ މަސައްކަތުގައި އުޅުއްވާ ފަރާތްތަކަށާއި އެހެނިހެން ވިޔަފާރިކުރާ ފަރާތްތަކަށް ކުރަމުންދާ ކަމަށެވެ. އެހެންކަމުން އެކަމަށް ހައްލެއް ހޯދުމަށްޓަކައި އެ ކޯޕަރޭޝަނުގެ އިސްނެގުމުގެ މަތިން މުދާ އަރުވައި ބޭލުމުގެ ޚިދުމަތް ދިނުމަށް ހުޅުމާލެ ދެވަނަ ފިޔަވަހީގައި ވަގުތީ ޖެޓީއެއް ގާއިމުކުރެވިފައިވާ ކަމަށެވެ.
އެޗްޑީސީގެ އިއުލާނުގައި އިތުރަށް ބުނެފައި ވަނީ އެ ޖެޓީގެ ޚިދުމަތް ހޯދަން ބޭނުންވާ ފަރާތްތަކުން އެ ކޯޕަރޭޝަންގެ ''މައި ހުޅުމާލެ'' ޕޯޓަލް މެދުވެރިކޮށް ޖާގަ ކަށަވަރުކުރުމުގެ އިންތިޒާމު ހަމަޖެހިފައިވާ ކަމަށެވެ. އެގޮތުން މި މަހުގެ 18 ވަނަ ދުވަހުގެ ކުރިން އެކަމަށް އެދި ހުށަހެޅުމުގެ ފުރުސަތު ހުޅުވާލައިފައިވާ ކަމަށެވެ.
އެޗްޑީސީގެ އިއުލާނާއި އެކު ޖެޓީން ދެވޭ ޚިދުމަތްތަކަށް ކަނޑައެޅިފައިވާ ފީގެ ތަފްސީލްތައް ހިމެނިފައިވާނެކަމަށް ބުނެފައިވާ އިރު އިއުލާން ނިންމާލަމުން ބުނެފައިވަނީ އިއުލާނުގައިވާ ގޮތާއި ޚިލާފަށް އެއްވެސް އުނޅަދެއް ޗެޓީއާއި ގާތްކުރުމާއި އަދި ޖެޓީ ބޭނުންކުރުމަކީ މަނާކަމެއްކަމަށެވެ.
އެޗްޑީސީގެ ފަރާތުން ހުޅުމާލޭގައި ދިރިއުޅޭ ފަރާތްތަކަށް ލުއިފަސޭހަ ގޮތްތަކެއް ހޯދައި ދިނުމުގެ ގޮތުން ދާދިފަހުން ވަނީ މޯލްޑިވްސް އިސްލާމިކް ބޭންކާއި ގުޅިގެން އެބޭންކުގެ ޑޮލަރު އޭޓީއެމްއެއް ބަހައްޓާ ޚިދުމަތްދޭން ވެސް ފަށާފައެވެ.
Advertisement
This content is created and paid for by advertisers and does not involve Voice Journalists
