ދ.އެއާޕޯޓުން ސީދާ އިންޑިއާއަށް މަންޓާ އެއާގެ ދަތުރުތައް ފަށައިފިއެވެ.

އެގޮތުން މަންޓާއެއާގެ ފުރަތަމަ އިންޓަނޭޝަނަލް ފްލައިޓް އިންޑިއާގެ ބެންގަލޫރުން ފުރައިގެން ސީދާ ދާލު އެއާޕޯޓަށް އިއްޔެ ވަނީ ޖައްސާފައެވެ.

މި ފްލައިޓުން ދަތުރުކުރި ފަރާތްތަކަށް މަރުޙަބާ ދެއްނެވުމަށްޓަކައި ފަތުރުވެރިކަމާ ބެހޭ ވަޒީރު އިބްރާޙިމް ފައިސަލާއި، މަންޓާ އެއާގެ ސީއީއޯ މުހައްމަދު ހަލީލް ގެ އިތުރުން ދާޢިރާ އާއި ގުޅުންހުރި ބައެއް އިސްވެރިންވެސް އެއާޕޯޓަށް ވަޑައިގަންނަވާފައި ވެއެވެ.

Advertisement

މަންޓާ އެއާގެ ފުރަތަމަ އިންޓަނޭޝަނަލް ފްލައިޓެއް އިއްޔެ ދާލު އެއާޕޯޓަށް ޖައްސާފައިވާ އިރު، މިއީ ދާލު އެއާޕޯޓުން ރާއްޖޭން ބޭރަށް ސީދާ ދަތުރުތައް ފެށިގެން ދިޔަ ފުރަތަމަ ފަހަރުވެސް މެއެވެ.

މަންޓާއެއާއިން ހާމަކުރި ގޮތުގައި އިންޓަނޭޝަނަލް ދަތުރުތައް ފެށުމުގެ މައިގަނޑު އެއް މަގުސަދަކީ ޓޫރިޒަމް އިތުރަށް ފުޅާ ކުރުން ކަމަށާއި ބެންގަލޫރަށް ދަތުރުތައް ފެށުމުން އެ ސަރަހައްދުގެ ޓޫރިޒަމަށް ވަރަށް ބޮޑު ކުރިއެރުމެއް ލިބިގެންދާނެ އެވެ.

އެގޮތުން އަންނަ މަހުގެ 5 ވަނަ ދުވަހުން ފެށިގެން ހަފުތާއަކު ތިން ދުވަހު ބެންގަލޫރާއި ދާލު އެއާޕޯޓާ ދެމެދު ދަތުރުތައް އޮންނާނެ ކަމަށާއި، އަދި ހަމަ އެއާއެކު ދާލު އެއާޕޯޓް ބޮޑު ކުރެވި ބޮޑަތި ބޯޓްފަހަރުތަކާއި އެކު ގިނަ މަންޒިލްތަކަކަށް ދަތުރު ކުރުމަކީ މަންޓާއެއާގެ އިންމީދެއް ކަމަށެވެ.

ދ. އަތޮޅުގައި މިހާރުވެސް 8 ރިސޯޓެއް ހިންގަމުންދެއެވެ. އޭގެ ތެރޭގައި އެންމެ މަތީ ފަންތީގެ ބައެއް ރިސޯޓުތައް ވެސް  ހިމެނެ އެވެ. އޭގެ ތެރޭގައި ކަނޑިންމަ މޯލްޑިވްސް، ނިޔާމަ ޕްރައިވެޓް އައިލެންޑް ފަދަ ރިސޯޓްތައް ފާހަގަ ކޮށްލެވެއެވެ. މި ދަތުރުތައް ފެށުމުން އެ ރިސޯޓް ތަކަށް ދަތުރު ކުރާ ފަތުރުވެރިންނަށާއި، އާއްމުންނަށް ބޮޑު ފަސޭހައެއް ލިބޭނެ ކަމަށް މަންޓާއެއާއިން ބުނެއެވެ.

މަންޓާއެއާ އަކީ ރައްޖޭގައި އެންމެ ފަހުން އޮޕަރޭޓްކުރަން ފެށިން އެއް އެއާލައިންކަމަށް ވިޔަސް މިވީ ކުރުމުއްދަތުގެ ތެރޭގައި އެ އާލަނުންވަނީ ބޮޑަތިކުރިއެރުންތަކެއް ހޯދާފައެވެ.