އެމެރިކާގެ ޚާރިޖިއްޔާގެ ޑެޕިއުޓީ ސެކްރެޓަރީ އޮފް ސްޓޭޓް ރިޗަރޑް ވަރުމާ ދިވެހިރާއްޖެއާއި އިންޑިއާއާއި ސްރީލަންކާއަށް ދަތުރުފުޅެއް ކުރެއްވުމަށް ހަމަޖެހިއްޖެއެވެ. އިންޑިއާ ދަރިކޮޅުގެ މިސްޓަރ ވަރުމާގެ މިދަތުރުފުޅު އޮތީ މިއަދުންފެށިގެން މިމަހުގެ 23 އަށެވެ.

ހުކުރު ދުވަހު އެމެރިކާގެ ޚާރިޖިއްޔާއިން ނެރުނު ބަޔާނެއްގައި ބުނެފައިވަނީ މިދަތުރަކީ އިންޑިއާ ކަނޑަކީ މިނިވަންކަމާއެކު ހުޅުވިފައިވާ އަދި ސަރަހައްދުގެ ގައުމުތަކަށް ލާބައާއި މަންފާހުރި ސަރަހައްދެއްގެ ގޮތުގައި ބޭއްވުމަށް އެމެރިކާ ޖާމިނުވާ ޖާމިނުވުން ކަށަވަރުކޮށްދޭކަން ދެއްކުމުގެ ގޮތުންނެވެ.

މިސްޓަރ ވަރުމާ މިދަތުރުފުޅު ކުރައްވަނީ ދިވެހިރާއްޖޭގައި ތިބި އިންޑިއާގެ އަސްކަރީ ސިފައިން ބޭލުމަށް ދިވެހިރާއްޖެއިން ބާރުއަޅަމުންދާ މައްސަލާގައި އިންޑިއާއިން ވަރަށް ބޮޑަށް ހިތްހަމަނުޖެހި އެގައުމުގެ ކޯޕަރޭޓް ބޮޑެތި ނޫސްތަކާއި ޓީވީ ސްޓޭޝަންތަކާއި ވެރިކަންކުރާ ޕާޓީއަށް ނިސްބަތްވާ ސޯޝަލް މީޑިއާ އިންފްލުއެންސަރުން ދިވެހިރާއްޖެ ބޮއިކޮޓް ކުރުމަށާއި އެކިއެކި ކަންކަމާއި ގުޅުވައި ދިވެހިރާއްޖޭގެ އަގު ވައްޓައިލުމަށް ދޮގުޚަބަރު ފެތުރުން އިންތިހާއަށް އިތުރުކޮށްފައިވާ ދަނޑިވަޅެއްގައެވެ.

ޓޫރިޒަމް ބޮއިކޮޓް ކުރުމަށް ފެށި ކެމްޕެއިން ވައިގައި ނުހިފުމުން ދިވެހިރާއްޖޭގެ އިގްތިސާދު ކުޑަކަކޫމައްޗަށް ތިރިކޮށް އިންޑިއާގައި އާދޭސްކުރާ ގައުމަކަށްވޭތޯ މިހާރު ފަށައިގެން އުޅޭ ކެމްޕެއިނަކީ ދިވެހިރާއްޖެއަކީ ބަގްރޫޓްވެފައި އޮތްތަނެއްކަން އައިއެމްއެފުން ކަނޑައަޅައިފިކަމަށް ބުނެ ފަތުރާ ދޮގު ޚަބަރުތަކެވެ.

އަނެއްވާހަކައަކީ ދިވެހިރާއްޖެއާއި ގާތުގައި އޮންނަ މަލިކުގައި އިންޑިއާގެ އަސްކަރީ ބޭހެއް ހަދާތީ ދިވެހިރާއްޖެއިން ފާޑުކިޔަމުންދާކަމަށް ބުނެފަތުރަމުންދާ ޚަބަރެވެ. މަލިކުގައި އިންޑިއާއިން އަސްކަރީ ބޭހެއް ހަދިއްޔާ އަދި ނުހެދިއްޔާ ދިވެހިރާއްޖެއަށް ކޮންކަމެއް ހެއްޔެވެ. ދިވެހިރާއްޖެއަކީ އެއްވެސް މައިދާނެއްގައި އިންޑިއާއާއި ވާދަޖަހާ ގައުމެއް ނޫނެވެ.

އެމެރިކާ ސަރުކާރުގެ އޮފިޝަލް ފުރަތަމަ ނިއުދިއްލީއަށް ވަޑައިގެންނެވުމަށްފަހު ދިވެހިރާއްޖެއަށް ވަޑައިގެން މަޝްވަރާ ކުރައްވާނީ މެރިޓައިމް ސެކިއުރިޓީއާއި އެހެން ދާއިރާތަކުން ގުޅުން ވަރުގަދަ ކުރުމާއިބެހޭގޮތުންނެވެ.