ސްޕްރީމް ކޯޓަކުން ޤާނޫނު ހަދާ މަޖިލީހެއްގެ މައްޗަށް ވަގުތީ އަމުރެއް ނެރުމުގެ މާނައަކީ ދައުލަތުގެ ބާރެއްގެ މަސައްކަތް ހުއްޓައިލުމަށް އަމުރުކުރުން ކަމަށާ، އެއީ ވަރަށް ސީރިއަސް މައްސަލައެއް ކަމަށް ރައްޔިތުންގެ މަޖިލީހުގެ މާފަންނު އުތުރުދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ. 

ރޭ ސަންގު ޓީވީން ގެނެސްދިން "ޚަބަރަށްފަހު" ޕްރޮގްރާމް ގައި ވާހަކަ ދައްކަވަމުން އިންތި ވިދާޅުވީ، މަޖިލީހުގެ ކަންކަމާއި ގުޅޭ މައްސަލަތަކަކީ ސްޕްރީމްކޯޓުގެ އިހްތިޞާސް އޭގައި ހިމެނޭ ކަންކަން ނަމަވެސް، ސްޕްރީމްކޯޓުން އެގޮތަށް ސިޔާސީ މައްސަލަ ތަކުގެ ތެރޭއަށް ވަނުމުން ދެކޮޅު ނުޖެހޭ ނަތީޖާ ނުކުންނާނެ ކަމަށެވެ. 

އެހެންނަމަވެސް، މިހާރު ސްޕްރީމްކޯޓުން މަޖިލީހުގެ މައްޗަށް ވަގުތީ އަމުރު ނެރެ، މަޖިލީހުގެ މަސައްކަތް ހުއްޓުވަމުންދާ ކަމަށާ، އެއީ ވަރަށް ޚައްސާސް މައްސަލައެއް ކަމަށް އޭނާ ވިދާޅުވި އެވެ. 

އިންތި އިތުރަށް ވިދާޅުވީ، ސްޕްރީމުކޯޓަށް މަޖިލީހާއި ގުޅޭ މައްސަލައެއް ބެލިދާނެ ކަމަށާ، އެހެން ނަމަވެސް، ވަގުތީ އަމުރު ނެރެގެން މަޖިލީހުގެ މަސައްކަތް ހުއްޓައި ނުލެވޭނެ ކަމަށާ، އެއީ ވަރަށް ޚައްސާސް މައްސަލައެއް ކަމަށެވެ. އެކަމާއި މެދު މަޖިލީހުގެ ހުރިހާ މެންބަރުންވެސް ވިސްނަންޖެހޭ ކަމެއް ކަމަށެވެ. 

މަޖިލީހުގެ މެންބަރުންގެ އަދަދު ގުނާއިރު ހުސްވެފައި ހުރި ގޮނޑިތައް ނުހިމަނާ ގުނާ ގޮތަށް މަޖިލީހުގެ ގަވާއިދަށް ވަނީ އިސްލާހެއް ގެނެސްފައެވެ. 

ނަމަވެސް އެ އިސްލާހު ގާނޫނު އަސާސީއާ ހިލާފުކަމަށް ބުނެ ދައުލަތުން އެ މައްސަލަ ސްޕްރީމް ކޯޓަށް ހުށަހެޅުމުން، ސްޕްރީމްކޯޓުން އެ މައްސަލާގައި ކުރި ހުކުމް ގައި ބުނީ، އެއީ ގާނޫނު އަސާސީއާ ޚިލާފް ކަމަށް ދައުލަތުން ތުހުމަތު ކުރާ ހާލަތެއްގައި، އެ އިސްލާހަށް އަމަލުކުރުން މަޑުޖައްސާލަން ޖެހޭ ކަމަށެވެ.

އަދި ޖުމްލަ މެމްބަރުންގެ އަދަދު ކުރިން ގުނަމުން އައީ ގާނޫނު އަސާސީގައި ބުނެފައިވާ ގޮތުގެ މަތިން ކަމަށް ވާއިރު، ކޯޓުން ގޮތެއް ނިންމަންދެން މަޖިލީހުން ކުރިން އަމަލުކުރިގޮތް ދެމިއޮންނަންޖެހޭކަމަށް އެ އަމުރުގައިވެއެވެ.