އަލަށް އެމްޑީޕީގެ ރައީސް ކަމުގެ މަގާމަށް އިންތިޚާބުވެވަޑައިގެންނެވި ކުރީގެ ފޮރިން މިނިސްޓަރު އަބްދުالله ޝާހިދަށް އެމްޑީޕީ ކުރީގެ ރައީސް، މުހައްމަދު ނަޝީދާއި، އެ ޕާޓީގެ ވަގުތީ ރައީސް މަރުހަބާ ދަންނަވައިފި އެވެ. 

ޝާހިދަށް ރައީސް ޞާލިހާއި ނަޝީދު މަރުހަބާ ދަންނަވާފައި ވަނީ ރޭ އެކްސްގައި ކުރެއްވި ޕޯސްޓެއްގައި އެވެ. 

އެގޮތުން ޞާލިހު ކުރެއްވި ޕޯސްޓުގައި ވަނީ ޕާޓީގެ ރައީސްކަމުގެ މަޤާމްގައި ހުންނަވައިގެން، ޤައުމާއި ރައްޔިތުންނަށް އަގުހުރި މަސައްކަތްތަކެއް އެމަނިކުފާނު ކޮށްދެވާނެކަމުގެ ފުރިހަމަ އިތުބާރާއި ޔަޤީންކަން އޮތް ކަމަށް ވިދާޅުވެފައެވެ.

‏ރައީސް ޞާލިހުގެ ޕޯސްޓަށް ރައްދުދެއްވައި ޝާހިދު ވިދާޅުވީ، އެމްޑީޕީގެ އިސްލީޑަރުކަމާއި، ވަގުތީ ރައީސްގެ ހައިސިއްޔަތުން އެމަނިކުފާނު އެމްޑީޕީ އަށް ކޮށްދެއްވާފައިވާ ޚިދުމަތްތަކަށް ޝުކުރު ދަންނަވާފައެވެ. އަދި އެމްޑީޕީގެ ރައީސް ކަމުގެ ވާޖިބުތަށް އަދާކުރުމުގައި ރައީސް ޞާލިހުގެ ލަފަޔާއި އިރުޝާދާއި އެހީތެރިކަން ލިބެމުންދާނެކަމުގެ ޔަގީންކަންދެއްވާފައިވާތީ ހިތްހަމަޖެހޭ ކަމަށްވެސް ވިދާޅުވި އެވެ.

ޝާހިދު ދިވެހި ރައްޔިތުންގެ ޑިމޮކްރަޓިކް ޕާޓީގެ ރައީސްކަމުގެ މަގާމަށް އިންތިހާބުވެ ވަޑައިގެންނެވުމާއި ގުޅިގެން ކުރެއްވި ޕޯސްޓެއްގައި ވަނީ އެ ޒިންމާއާއި ހަވާލު ވަނީ ޕާޓީގެ މެމްބަރުންގެ ފުރިހަމަ އިތުބާރާއެކު އާބާރެއްގައި އެ ޕާޓީ ކުރިއަށް ގެންދަން ކަމަށެވެ. އަދި ދިވެހި ޤައުމާއި ދިވެހި ރައްޔިތުންގެ އުންމީދުތަކަށް އެމް.ޑީ.ޕީ ކާމިޔާބު ހޯދާނެ ކަމަށްވެސް ވިދާޅުވި އެވެ. 

އެމްޑީޕީގެ ރައީސްކަމަށް ކުރިމަތިލުމަށް ހުޅުވާލި މުއްދަތުހަމަވިއިރު، އެމަޤާމަށް ކުރިމަތިލާފައިވަނީ ހަމައެކަނި ޝާހިދު ކަމަށް ވުމުން، އެއްވެސް އިންތިޚާބަކާއިނުލާ އޭނާ އެ މަގާމަށް ވަނީ ހޮވިފައެވެ.