ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ޒޯން 7 ގެ ގުރޫޕް ސްޓޭޖުގެ ފަހުމެޗުގައި 4-1 ގެ ނަތީޖާއަކުން އެންމެ ފަހުގެ ޒޯން ޗެމްޕިއަން ގދ.ވަދޫ ބަލިކޮށް މުބާރާތުގައި އަލަށް ވާދަކުރަމުން އަންނަ ސ.ހިތަދޫ އިން ފައިނަލުގެ ޖާގައެއް ކަށަވަރުކޮށްފިއެވެ.

ވާދޫ އިން މުބާރާތުގެ ޒޯން ބުރުން ޖާގަ ހޯދީ ގދ. އަތޮޅު ޗެންޕިއަނުންގެ ހައިސިއްޔަތުންނެވެ. އަދި ހިތަދޫ އަކީ ސ.އަތޮޅުގެ އަތޮޅު ޗެންޕިއަން އެވެ.

ހުޅުމާލޭ ރެހެންދި ދެ ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފު ފެށިގެން ތިންވަނަ މިނެޓުގައި ހިތަދޫ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު ސަބާހު މަސްރޫރް އެވެ.

Advertisement

މިއީ އެޓީމުގެ މުހައްމަދު ރަފާހް އަބްދުﷲ މުޅިން ހުސްކޮށްލާފައި ޖައްސާލި ބޯޅައެއް ވާދޫގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ އެއްފަހަރުން ޖަހައި ގޯލުގެ މަތީ ދާގަނޑަށް ބޯޅަ އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ދެ މިނެޓު ފަހުން އެޓީމުގެ ހަސަން ރާއިފް އަހުމަދު ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން ހިތަދޫ ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ ހިތަދޫ ޓީމުންނެވެ. އެގޮތުން ދެވަނަ ހާފު ފެށިގެން ދެވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ހަސަން ރާއިފް އަހުމަދު އެވެ. މިއީ މިމެޗުގައި އޭނާ ކާމިޔާބުކޮށްދިން ދެވަނަ ލަނޑެވެ.

ވާދޫ ޓީމުން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ 37 ވަނަ މިނެޓުގައި ކާމިޔާބުކޮށްދިނީ މުހައްމަދު އިޔާދު އަލީ އެވެ. ނަމަވެސް އޭގެ ތިން މިނެޓު ފަހުން ހިތަދޫ ޓީމުން ވަނީ އިތުރު ލަނޑެއް ކާމިޔާބުކޮށް އަނެއްކާވެސް ތިން ލަނޑުގެ ލީޑެއް ހޯދާފައެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 4-1 ގެ ނަތީޖާއަކުން ހިތަދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ހިތަދޫ ޓީމުގެ ކެޕްޓަން ހާޒިމް ފައުޒީ އެވެ.

ޒޯނު 7 ގައި މިއަހަރު ފަސްޓީމަކުން ވާދަކުރިއިރު، ލީގު ބުރުގެ އެއްވަަނަ ޓީމުގެ ގޮތުގައި ފައިނަލުގެ ފުރަތަމަ ޖާގަ ހޯދީ ކުޅުނު ހަތަރު މެޗުން ވެސް މޮޅުވެ، ޏ. ދަޑިމަގު ފުޓްސަލް ޓީމެވެ. އަދި ގުރޫޕްގެ ދެވަނަ ހިތަދޫ ޓީމުން 9 ޕޮއިންޓާއެކު ހޯދިއިރު، މިދިޔައަހަރުގެ ގޯލްޑަން ފުޓްސަލް ޗެލެންޖުގެ ފައިނަލްގައި ކުޅުނު އެންމެ ފަހުގެ ރަނަރަޕް ގދ. ވާދޫ ޓީމު މިއަހަރުގެ މުބާރާތާއި އަލްވަދާއު ކިޔަންޖެހުނީ ޒޯނުބުރާއި ހަމައިން ނެވެ.