ރާއްޖޭގައި ޢަރަބި މީޑިއަމަށް ކިޔަވައިދޭ ހަމައެކަނި ސްކޫލް ކަމަށްވާ އަލް މަދަރުސަތުލް އަރަބިއްޔަތުލް އިސްލާމިއްޔާގެ އައު އިމާރާތުގެ އަމަލީ މަސައްކަތް މިއަދު ފަށައިފިއެވެ.
ޢަރަބިއްޔާގެ އާ ޢިމާރާތް އެޅުމަށް ހަމަޖެހިފައިވާ ކުރީގެ ކުނިކޮށި ހުރި ބިންކަމުގައިވާ 381 ނަންބަރު ކޮށީގައި، މިކަމަށް ހާއްޞަކޮށްގެން ބޭއްވުނު ރަސްމިއްޔާތެއްގައި މި މަސައްކަތް ފައްޓަވައި ދެއްވީ ތައުލިމާއި ބެހޭ ވަޒީރު ޑރ. އިސްމާއިލް ޝަފީޢުއެވެ.
މި ރަސްމިއްޔާތުގައި ވާހަކަދައްކަވަމުން ތައުލީމީ ވަޒީރު ވިދާޅުވީ މި އިމާރާތަކީ 10 ބުރީގެ އެންމެ ޒަމާނީ އިމާރާތެއް ކަމަށާއި، އަދި މި އިމާރާތަކީ އެންމެ ފުރަތަމަ އަންޑާރ ގްރައުންޑް ޕާކިންއަކާއިއެކު ދިވެހި ރާއްޖޭގައި ޤާއިމްކުރެވޭ އެންމެ ފުރަތަމަ ސުކޫލް އިމާރާތައް ވެގެންދާނެކަމަށެވެ.
" 150އަށް ވުރެ ގިނަ ސައިކަލު އަދި ސުކޫލަށް ބޭނުންވާ މުހިންމު 4 ފުރުޅުލީ ވެހިކަލްތައްވެސް ޕާކިން އޭރިޔާ ތެރޭގައި ޕާކު ކުރެވޭ ގޮތަށް ފަރުމާ ކުރެވިފައިވަނީ. 42 ކުލާސް ރޫމް، ސައިންސް ލެބް، ލެބޯޓްރީތަކާއި މަލްޓިޕާޕަސް ހޯލް އަދި ކުދިން ކުޅޭނެ ޓާރފެއްވެސް މި ގޯތި ތެރޭގައި ހިމެނޭނެ"
ވަޒީރު ޝަފީޢު ވިދާޅުވިއެވެ.
އަމީން ކޮންސްޓްރަކްޝަން ޕްރައިވެޓް ލިމިޓެޑާއި ޢަރަބިއްޔާ ސްކޫލް އެޅުމުގެ މަސައްކަތް ޙަވާލުކޮށްފައި ވަނީ 2022 ވަނަ އަހަރުގެ ސެޕްޓެމްބަރު މަހުގެ 29 ދުވަހުއެވެ. ނަމަވެސް ތަފާތު ސަބަބުތަކާއި ހުރެ ނިމިދިޔަ ރައީސް ޞާލީހްގެ ސަރުކާރު ނިމުނުއިރުވެސް އަރައްބިއްޔާ ސްކޫލުގެ އަމަލީ މަސައްކަތްވަނީ ނުފެށިއެވެ.
ދެއަހަރު ދުވަހުގެ ތެރޭގައި ނިންމާގޮތަށް މިއަދު މި ފެށުނު މަސައްކަތަކީ ރައީސް ޑރ.މުހައްމަދު މުއިއްޒުގެ ހަފުތާ 14 ގައި ކުރުމަށް ހިމަނާފައިވާ މަސައްކަތެކެވެ.
Advertisement
This content is created and paid for by advertisers and does not involve Voice Journalists
