ހުޅުމާލޭ ފުރަތަމަ، ދެވަނަ އަދި ތިންވަނަ ފިޔަވަހިން ގާތްގަނޑަކަށް ފަންސާހަކަށް ބިން، ކުރީ ސަރުކާރުން, ނުހައްގުން އެކިއެކި ފަރާތްތަކަށް ބަހާލާފައިވާ ކަމަށް އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވެއްޖެއެވެ.
"ދިވެހީންގެ ރާއްޖެ، މަޖިލީހަށް" ނަމުގައި މިރޭ ޕީއެންސީގެ އޮފީހުގައި ބޭއްވި ކެންޕެއިން ޖަގަހަ ޖަލްސާގައި ވާހަކަ ދައްކަވަމުން ފަޒުލް ވަނީ ކުރީ ސަރުކާރުން ހުޅުމާލެއިން އެކިއެކި ފަރާތްތަކަށް ގޯތި ބެހުމުގައި ޢަމަލު ކޮށްފައިވާ ގޮތާއިމެދު ކަންބޮޑުވުން ފާޅުކުރައްވާފައެވެ.
އެގޮތުން، ބައެއް ފަރާތްތަކަށް ގޯތި ކަނޑައިގެން ގޯތި ދިން ކަމަށް އެ ސަރުކާރުން ބުނި ނަމަވެސް އެއިން ބައެއް ގޯތިތައް ހުރީ ފެނު އަޑީގައި ކަމަށާ، އަނެއް ބައި ގޯތިތައް ހުރީ ހުޅުމާލޭގައި ހުރި "ވެލި ފަރުބަދަ ތަކާއި، ހިލަ ފަރުބަދަ ތަކުގައި" ކަމަށް އޭނާ ވިދާޅުވި އެވެ.
މަގާމާ ހަވާލުވެފައި އަޅުގަނޑު ބަލައިފިން ހުޅުމާލޭގެ ބިން ތަކަށް ވީ ކިހިނެއްތޯ؟ އަޅުގަނޑު އެތަނާއި ހަވާލުވިއިރުގައި، ހުޅުމާލޭގެ އެކަކާއި، ދޭކާއި، އަދި ކީއްތޯ، ނުހިއްކާ އޮތް ތަންވެސް، އެތަންތަނުންށ ގާތްގަނޑަކަށް ފަންސާހަކަށް ބިން، މިއޮތީ އެކިއެކި މީހުންނަށް ދީ ޚަލާސް ކޮށްލާފައި. ވިޔަފާރި އުސޫލުންނާއި އަދި ނުހައްގުން ދީފައި ހުރި ބައިވަރު ބިންތަކެއް އެބަހުރި. މިއަދުވެސް އެބަހުރި. މިވާހަކަ ދައްކަންޖެހޭ. ރައްޔިތުންނާއި ހަމައަށް ފޯރުކޮށްދޭން އެބަޖެހޭ. ކުރިއަށް އޮތް ތަނުގައި އެއީ ކޮން ފަރާތްތަކެއް ކަން ވެސް އަޅުގަނޑުމެން ހާމަކުރާނަން.
އިބްރާހީމް ފަޒުލް ރަޝީދު
މިރޭގެ ޖަލްސާގެ ތެރެއިން--ފޮޓޯ/ޕީޕީއެމް
"ބިންވެރިޔާގެ ކަންތަކުގައި އަޅުގަނޑު މިއަދު މިދިޔައީ. ދިޔައިރު ބިންވެރިޔާގެ ޕްލޮޓްތައް މި އަރަނީ ޖެހިގެން ހުރި ފަރުބަދައަަށް. ހިލަ ފަރުބަދަ ނޫނިއްޔާމުން ވެލި ފަރުބަދައަށް މި އަރަނީ. ދެން އަޅުގަނޑު ކައިރީ މި އަހަނީ ކީއްވެތޯ ނުދެވިގެން އުޅެނީ. ކިހިނެއް އަޅުގަނޑު ދެނީ؟ އެތަން ހުސްކޮށްގެންތާ ދެވޭނީ؟ ރީ ލޮކޭޓް ކޮށްގެން ނޫން ގޮތަކަށް އެކަން ކުރެވޭކަށް ނެތް. އެކަމު ޔަގީންކަން އަރުވަން، ރައީސް މުޢިއްޒުގެ ސަރުކާރުގައި އަޅުގަނޑުމެން އެކަން ކުރާނަން" ބިންތައް ކަނޑައަޅާފައި ހުރި ގޮތުން ބިން ނުދެވިގެން އުޅޭ ސަބަބު ހާމަ ކުރައްވައި، ބައެއް ބިންތައް ދޫކޮށްފައި ހުރި ތަން ނޫން އެހެން ތަނަކުން ދޭން ޖެހޭ ކަން ފާހަގަކުރައްވައި ފަޒުލް ވިދާޅުވިއެވެ.
މީގެ އިތުރުން ފަޒުލް ވަނީ، ހުޅުމާލޭގެ ތިންވަނަ ފިޔަވައްސާއި، ގުޅީފަޅު، ތިލަފުށި އަދި ރަސްމާލެ ހިއްކުން ހުއްޓިފައިވާ ކަމަށް ބުނެ އިދިކޮޅުން ދައްކަމުންދާ ވާހަކަތަކަށް ވެސް ރައްދު ދެއްވާފަ އެވެ.
އެއްވެސް މަސައްކަތެއް ނުހުއްޓޭ. އަޅުގަނޑުމެން ހަމައެކަނި މިވަގުތުގެ ހާލަތާއި ގުޅޭގޮތުން ތަރުތީބު ކޮށްލީ. ރައްޔިތުންގެ އެދުމަށް ތަރުތީބު ކޮށްލައިގެން އިސްފަސް ކޮށްލައިގެން ކުރިއަށް މިގެންދަނީ.
އިބްރާހީމް ފަޒުލް ރަޝީދު
ފަޒުލް ވިދާޅުވީ، ގުޅީފަޅު ހިއްކުމުގެ މަސައްކަތް ހަލުވި ދުވެލީގައި ކުރިއަށް ގެންގޮސް ބޮޑުބައެއް މިހާރުވެސް ނިންމާފައިވާ ކަމަށެވެ. އަދި މިހާރު މަސައްކަތް ކުރަމުންދަނީ ހުޅުމާލޭގެ ތިންވަނަ ފިޔަވަހި ހިއްކުމުގެ މަސައްކަތް ނިންމައި، އެތަންތަނުން ގޯތި ލިބުނު މީހުންނަށް ގޯތި ދޭން ފެށުމުގެ މަސައްކަތް ކަމަށެވެ.
Advertisement
This content is created and paid for by advertisers and does not involve Voice Journalists
