ހުޅުމާލެ ދެވަނަ ފިޔަވަހީގެ ލޯކަލް މާރުކޭޓް ގޮޅިތައް ހިލޭ ދޫކުރަން ނިންމައި، އެކަމަށް ޝައުގުވެރިވާ ފަރާތްތަކަށް ފުރުސަތު ހުޅުވާލައިފިއެވެ.

އެޗްޑީސީން ރޭ ނެރުނު އިއުލާނެއްގައި ބުނެފައިވަނީ ފެބްރުއަރީ 28 ގައި ފޭސް ދޭއްގެ ލޯކަލް މާރުކޭޓް ގޮޅިތައް ކުއްޔަށް ހިފަން ބޭނުންވާ ފަރާތްތަކަށް ހުޅުވާލެވުނު ނަމަވެސް މުއްދަތް ހަމަވިއިރު އެކަމަށް ޝައުގުވެރިވެ އެއްވެސް ފަރާތަކުން ހުށައަޅާފައިނުވާ ކަމަށެވެ.

އެހެން ކަމުން އެކަމަށް ޝައުގުވެރިވާ ފަރާތްތަކަށް ކުއްޔަކާ ނުލާ ގޮޅިތައް ދޫ ކުރަން ނިންމާފައިވާ ކަމަށް އެ ކޯޕަރޭޝަނުން ބުނެފައި ވެއެވެ. 

Advertisement

އެޗްޑީސީން އިތުރަށް ބުނީ، ހިލޭ ގޮޅި ދޫކުރަން ހަމަޖެހިފައިވަނީ 2 އަހަރުގެ މުއްދަތަކަށް ކަމަށާ މި 2 އަހަރުގެ މުއްދަތުގައި އެއްވެސް ކުއްޔެއް ނުނަގާނެ ކަމަށެވެ. އެގޮތުން ޖުމްލަ 16 ގޮޅިއެއް މި އުސޫލުން ދޫކުރާނެ ކަމަށާއި، ގޮޅި ދޫކުރާނީ ހުޅުމާލޭގެ ރަށްވެއްސެއްގެ ގޮތުގައި ރަޖިސްޓްރީވެފައިވާ ފަރާތްތަކަށް އެކަނި ކަމަށް އެކޯޕަރޭޝަނުން ބުނެފައިވެއެވެ. 

އެހެންކަމުން، އެކަމަށް ޝައުގުވެރިވާ ހުޅުމާލެ ރައްޔިތުންނަށް ފޯމް ހުށަހެޅުމުގެ ފުރުސަތު ހުޅުވާލާފައިވާ ކަމަށާ، ފޯމު ދޫކުރާނީ 9 މަރޗް ވާ ހޮނިހިރު ދުވަހު ހެނދުނު 9:30 އިން 11:00 އަށް ގާޒީ ސުކޫލުގައި ކަމަށް އެޗްޑީސީން ބުނެފައިވެއެވެ.

މީގެ އިތުރުން އެ ފޯމް www.hdc.mv އަދި properties.hdc.mv އިންވެސް ލިބެން ހުންނާނެ ކަމަށް އެޗްޑީސީގެ އިއުލާނުގައިވެއެވެ.