ރޯދަމަހަށް ތައްޔާރުވުމުގެ ގޮތުން ހައުސިންގް ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގެ ފޭސް 2 ގައި ވަގުތީ މިސްކިތެއް މިއަދު ހުޅުވައިފިއެވެ. 

ރޯދަމަހަށް ހާއްސަކޮށްގެން އިމާރާތްކުރެވުނު މި ވަގުތީ މިސްކިތުގެ ނަމަކީ މަސްޖިދުލް ޝާކިރީން އެވެ.

މި މިސްކިތް ގާއިމުކުރެވިފައި މި ވަނީ ފޭސް 2 ގެ ހިޔާ ޕާރްކް ސަރަހައްދުގައެވެ.

އެޗްޑީސީން ބުނީ، މި މިސްކިތަކީ ހިޔާ ސަރަހައްދުގައި ދިރިއުޅޭ އިސްރަށްވެހިންނާއި ހާއްސަ އެހީ އަށް ބޭނުންވާ މީހުންނަށް މިސްކިތަށް ދިއުމަށް ދުރު ސަރަހައްދަކަށް ދާންޖެހުމުން ދިމާވާ ދަތިތަކަށް ހައްލެއް ގެނައުމުގެ ބޭނުމުގައި ހުޅުވިފައިވާ މިސްކިތެއް ކަމަށެވެ.

އަދި މި މިސްކިތަކީ މުޅި ޖުމަލަކޮށް އެއްފަހަރާ 100 މީހުންނަށް ނަމާދުކުރެވޭ ގޮތަށް ފަރުމާކުރެވިފައިވާ މިސްކިތެއް ކަމަށާ، މި މިސްކިތުގައި އަންހެން ބޭފުޅުންނަށް ވެސް ނަމާދު ކުރެވޭނެ އިންތިޒާމް ހަމަޖެހިފައިވާ ކަމަށެވެ.

އެޗްޑީސީން އަބަދުވެސް މަސައްކަތް ކުރަމުން ދަނީ ހުޅުމާލޭގައި ދިރިއުޅޭ ރައްޔިތުންނަށް ފަސޭހަވާނެ ގޮތަށް ގިނަ ހިދުމަތްތަކެއް ފޯރުކޮށްދިނުމަށް ކަމަށް އެ ކޯޕަރޭޝަނުން ބުނެފައިވެއެވެ. 

ކަލަންޑަރުގައި ވާގޮތުން ނަމަ، ރަމަޟާން މަހުގެ ފުރަތަމަ ދުވަހަކީ މިމަހު 11 ވަނަ ދުވަހެވެ.