ޤަވަޢިދާ ޚިލާފަށް ބެހެއްޓިފައިވާ އުޅަނދު ޓޯ ކުރުމުގެ މަސައްކަތުގެ ތެރެއިން ރޭ އެކަނިވެސް ފުލުހުން މާލެ ސިޓީ އިން 40 އުޅަނދު ޓޯކޮށްފިއެވެ.

ފުލުހުން ބުނީ، މާލޭ ސިޓީގެ މަގުތަކުގައި، ޤަވައިދާ ޚިލާފަށް ޕާކްކޮށްފައިވާ އުޅަނދުތައް ނެގުމަށް ކުރާ މަސައްކަތުގެތެރެއިން، އަމީނީމަގުން 15 އުޅަނދެއް ރޭގައި ޓޯ ކުރެވިފައިވާކަމަށެވެ.

ގަވާއިދާ ހިލާފަށް ޕާކުކުރާ އުޅަނދުތަކާ މެދު ފިޔަވަޅު އަޅަން ފަށާނެކަން ފުލުހުން އިއުލާން ކުރީ މި މަހު ތިންވަނަ ދުވަހު އެވެ. އަދި މި މަހުގެ ފަސް ވަނަ ދުވަހު، މަގުތައް ބޭނުންކުރާ މީހުންނަށް ދަތިވާގޮތަށް ގަވާއިދާ ހިލާފަށް ޕާކުކޮށްފައިހުރި އުޅަނދުތަކާއި ގިނަ ދުވަސްވެފައިހުރި އުޅަނދުތައް ޓޯކުރުމުގެ މަސައްކަތް ފުލުހުން ވަނީ ފަށާފައެވެ.

ފުލުހުން ދަނީ އެއްގަމު އުޅަނދު ދުއްވުމުގައި ގަވާއިދާ ހިލާފުވޭތޯ ހާއްސަ ސަމާލުކަމެއްދީގެން ބައެއް ސަރަހައްދުތައް ވެސް ބަލަހައްޓަމުންނެވެ. އެއީ:

1) ގްރީން ޒޯން

2) ޕަބްލިކް ޓްރާންސްޕޯޓް ދުއްވާ ތަންތަން

3) މަގުތަކާއި، ގޯޅިތަކުގެ ކަންމަތިތައް

4) ސްކޫލް ސަރަހައްދުތައް

5) ހޮސްޕިޓަލްތަކާއި އޮފީސްތަކާއި ހާއްސަ އެހީއަށް ބޭނުންވާ މީހުންނަށް ހާއްސަ ކުރެވިފައިވާ ތަންތަން

6) މިސްކިތްތަކާއި އާންމު ގޭބިސީތަކާއި ގަރާޖު ފަދަ ތަންތަންނަށް ވަދެ ނުކުމެ ހަދަން ދަތިވާގޮތަށް ހުންނަ ތަންތަން

މަގުމަތީގައި ހިނގާ މީހުންނާއި ދުއްވާ އުޅަނދުތަކާއި، ޚާއްޞަކޮށް ޕަބްލިކް ޓްރާންސްޕޯޓާއި އިމަޖެންސީގައި ދުއްވާ އުޅަނދުތަކަށް ދަތިވާގޮތަށް ގަވާއިދާ ޚިލާފަށް އުޅަނދު ޕާކުކުރަމުންދާ މައްސަލަ ފާހަގަކުރެވިފައިވާކަމަށް ފުލުހުން މީގެ ކުރިން ބުނެފައިވާއިރު، ޕާކިން ޒޯންތަކުގައި ނޫނީ ޕާކު ނުކުރާން ފުލުހުން ވަނީ އެދިފަ އެވެ.