މާލެސިޓީގެ މަގުމައްޗަށް ކުނި އަޅާ މީހުން ހޯދައި އެމީހުން ލައްވާ ކުނި ނެގުމުގެ މަސައްކަތް ކުރިއަށްދާ ކަމަށް ފުލުހުން ބުނެފިއެވެ.
ފުލުހުން ބުނީ، މަގުތަކަށް ކުނިއަޅާ މީހުންނަށް ނަސޭހަތްދީ ޖޫރިމަނާ ކުރުމުގެ މަސައްކަތް ކަމާއި ގުޅުންހުރި އިދާރާތަކާ ގުޅިގެން ފުލުހުން ކުރަމުންދާ ކަމަށާއި، ކުނި އަޅާ މީހާ ނުވަތަ ބަޔަކު ދެނެގަނެވިފައިވާނަމަ އެމީހަކު ނުވަތަ އެބަޔަކު އެޅި ކުނި އެމީހުން ލައްވާ ނަގުވައި މަގު ސާފު ކުރުމުގެ މަސައްކަތް ވެސް ކުރުވަމުންދާ ކަމަށް ފުލުހުން ބުންޏެވެ.
ފުލުހުން ވަނީ މާލެ ސިޓީގެ މަގުތަކަކީ ސާފުތާހިރުތަނަކަށް ހެދުމަށް، މާލެ ސިޓީގައި ދިރިއުޅޭ ހުރިހާ ރައްޔިތުންގެ އެހީތެރިކަމާއި އެއްބާރުލުން ބޭނުންވާކަމަށް ބުނެ، މިކަމަށް ކުރެވޭ މަސައްކަތުގައި ފަރުދީ ޒިންމާ އަދާކޮށް ބަލިތައް ފެތުރުމުން ރައްކާތެރިވުމަށް މަގުތަކަށް ކުނި އެޅުމުން ދުރުހެލިވުމަށް އިލްތިމާސްކޮށްފައެވެ.
ފުލުހުން މިފަދައިން ބުނެފައިވާއިރު، މާލޭގެ މަގަކަށް ކުނި އެޅި މީހަކު ހޯދައިގެން އެ މީހާ ފުލުހަށް ހާޒިރުކޮށް، އޭނާ ޖޫރިމަނާކޮށްފައިވާ ކަމަށް އިއްޔެ މާލޭ ސިޓީ ކައުންސިލުން ވެސް ވަނީ ބުނެފައެވެ.
މާލޭގެ މަގުތަކަށް ކުނިއެޅުމުގެ މައްސަލަ ބޮޑުވެފައިވާއިރު، މިދިޔަ 18 ދުވަސްތެރޭ އެކަނިވެސް މާލެއިން 305.65 ޓަނުގެ ކުނި ނަގާފައިވާ ކަމަށް މާލެ ސިޓީގެ މޭޔަރު އާދަމް އާޒިމް ވެސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
